സുധാ കൊങ്ങരയും സൂര്യയും ഒന്നിക്കുന്ന ഏറ്റവും പുതിയ ചിത്രമാണ് പുറനാനൂറ്. ചിത്രത്തിന്റെ പ്രഖ്യാപനം നടന്നിട്ട് കുറച്ച് മാസങ്ങളായെങ്കിലും ചിത്രീകരണം ഇതുവരെയും ആരംഭിച്ചിട്ടില്ല. അടുത്തിടെ സിനിമയുടെ ചിത്രീകരണം ഉടൻ തുടങ്ങുമെന്ന് അറിയിച്ച് അണിയറ പ്രവർത്തകർ രംഗത്തെത്തിയിരുന്നു. ചില പ്രീപ്രൊഡക്ഷൻ ജോലികൾ നടക്കുന്നതിനാലാണ് ചിത്രം വൈകുന്നതെന്നും അറിയിച്ചിരുന്നു. ഇപ്പോഴിതാ തിരക്കഥയിലെ അഴിച്ചുപണികൾ നടക്കുന്നതിനാലാണ് ചിത്രം വൈകുന്നതെന്ന വാർത്തയാണ് പുറത്തുവരുന്നത്.
സുധ കൊങ്ങരയുമായി തിരക്കഥയുടെ കാര്യത്തിൽ സൂര്യയ്ക്ക് ചില വിയോജിപ്പുകളുണ്ടെന്നാണ് പുതിയ റിപ്പോർട്ട്. സംവിധായികയോട് തിരക്കഥ തിരുത്താൻ നടൻ ആവശ്യപ്പെട്ടെന്നുമാണ് തമിഴ് സിനിമാ മാദ്ധ്യമങ്ങൾ റിപ്പോർട്ട് ചെയ്യുന്നത്. സൂര്യ നായകനാകുന്ന 43-ാമത് ചിത്രമാണിത്. ദുൽഖർ സൽമാനും ചിത്രത്തിൽ പ്രധാന വേഷത്തിൽ എത്തുന്നുണ്ട്. നസ്രിയ ഫഹദാണ് ചിത്രത്തിലെ നായിക. ബോളിവുഡ് താരം വിജയ് വർമ്മയും ചിത്രത്തിലൂടെ തമിഴിൽ അരങ്ങേറ്റം കുറിക്കുകയാണ്.
മധുരയിലായിരിക്കും സിനിമയുടെ ചിത്രീകരണം നടക്കുകയെന്നാണ് വിവരം. നാല് മാസം മുമ്പ് പുറത്തുവന്ന പ്രഖ്യാപന വീഡിയോയും ശ്രദ്ധ നേടിയിരുന്നു. ജിവി പ്രകാശാണ് ചിത്രത്തിന്റെ സംഗീത സംവിധാനം നിർവ്വഹിക്കുന്നത്. അതേസമയം സിരുത്തൈ ശിവ സംവിധാനം ചെയ്യുന്ന കങ്കുവയാണ് സൂര്യയുടേതായി റിലീസിനൊരുങ്ങുന്ന ചിത്രം. കാർത്തിക് സുബ്ബരാജിനൊപ്പമുള്ള ചിത്രമാണ് അണിയറയിൽ ഒരുങ്ങുന്ന മറ്റൊരു ചിത്രം. ഈ സിനിമയുടെ പ്രഖ്യാപനം ഇന്നലെയാണ് നടന്നത്.
