മലയാളികളുടെ പ്രിയ നടൻ ഉണ്ണി മുകുന്ദൻ നായകനാകുന്ന ഏറ്റവും പുതിയ ചിത്രമാണ് ജയ് ഗണേഷ്. ചിത്രത്തിന്റെ പ്രമോഷൻ പരിപാടികൾ പുരോഗമിക്കുകയാണ്. കഴിഞ്ഞ ദിവസമായിരുന്നു ജയ്?ഗണേഷ് ടീം ചേർന്ന് ദിവ്യാംഗരായ 100 പേർക്ക് വീൽചെയറുകൾ വിതരണം ചെയ്തത്. ഇതിന്റെ സന്തോഷം പങ്കുവച്ചിരിക്കുകയാണ് നടൻ.
‘എന്റെ ഹൃദയത്തെ സ്പർശിച്ച സിനിമയുടെ ഭാഗമായി ഇതെങ്കിലും അവർക്ക് വേണ്ടി ചെയ്യാൻ സാധിച്ചുവെന്നതിൽ അതിയായ സന്തോഷമുണ്ട്. യുഎംഎഫിനും എൽവിഎമ്മിനും വേണ്ടി ഉണ്ണി മുകുന്ദൻ ചാരിറ്റി ഫൗണ്ടേഷനിലൂടെയായിരുന്നു 100 വീൽചെയറുകൾ വിതരണം ചെയ്തത്. എന്റെ അച്ഛൻ, സഹപ്രവർത്തക മഹിമ നമ്പ്യാർ, മാദ്ധ്യമപ്രവർത്തകർ, ആരാധകർ, വിസാറ്റ് കോളേജ് വിദ്യാർത്ഥികൾ, കോളേജ് അധികൃതർ എന്നിവർ നൽകിയ പിന്തുണയ്‌ക്കും ഞാൻ നന്ദി അറിയിക്കുന്നു. വരാനിരിക്കുന്ന പലകാര്യങ്ങളുടെയും തുടക്കമാണിത്. ജയ് ഗണേഷ് എനിക്ക് കേവലമൊരു സിനിമ മാത്രമാകില്ല.’
View this post on Instagram
പൊതുപരിപാടികളിലും ചടങ്ങുകളിലും ‘ഫ്രീഡം ഓൺ വീൽസ്’ ടീം അംഗങ്ങൾക്ക് കൂടുതൽ അവസരം നൽകണമെന്ന് ഉണ്ണി മുകുന്ദൻ പറഞ്ഞു. അവർ അസാമാന്യ പ്രതിഭകളാണെന്നും അവരുടെ പ്രകടനം തന്നെ വല്ലാതെ അതിശയിപ്പിച്ചെന്നും ഉണ്ണി മുകുന്ദൻ പോസ്റ്റിൽ പങ്കുവച്ചിരുന്നു. കൂടുതൽ വിശദാംശങ്ങൾക്കായി ഫ്രീഡം ഓൺ വീൽസിനെ ബന്ധപ്പെടേണ്ട വിവരങ്ങളും താരം പങ്കുവച്ചു.
രഞ്ജിത്ത് ശങ്കർ തിരക്കഥയെഴുതി സംവിധാനം ചെയ്ത ജയ് ഗണേഷിൽ ദിവ്യാംഗനായാണ് ഉണ്ണിമുകുന്ദൻ എത്തുന്നത്. ഏപ്രിൽ 11നാണ് ചിത്രം തിയേറ്ററുകളിൽ എത്തുക. ഉണ്ണി മുകുന്ദൻ ഫിലിംസും രഞ്ജിത്ത് ശങ്കറിന്റെ ഡ്രീംസ് എൻ ബിയോണ്ടും ചേർന്നാണ് ചിത്രം നിർമ്മിക്കുന്നത്.
ദിവസങ്ങൾക്ക് മുൻപ് തിരുവനന്തപുരത്ത് വച്ച് നടന്ന ട്രെയിലർ ലോഞ്ചിൽ സിനിമയുടെ അണിയപ്രവർത്തകർക്കൊപ്പം മുഖ്യതിഥികളായി എത്തിയത് ദിവ്യാംഗരായിരുന്നു. തന്റെ ജീവിതത്തെ മാറ്റിമറിച്ച കഥാപാത്രമാണ് ജയ് ഗണേഷിൽ അവതരിപ്പിച്ചതെന്നായിരുന്നു ഉണ്ണി പറഞ്ഞത്. ജയ്ഗണേഷിന്റെ വിജയാഘോഷത്തിന്റെ വേദിയിൽ ദിവ്യാംഗർ ഉണ്ടാകുമെന്നും ഉണ്ണി അന്ന് ഉറപ്പ് നൽകിയിരുന്നു.
