കൊച്ചി: യുവനടൻ സുജിത് രാജ് കൊച്ചുകുഞ്ഞ്(32) വാഹനാപകടത്തിൽ മരിച്ചു. കഴിഞ്ഞ 26ന് ആലുവ-പറവൂർ റോഡിലുള്ള സെറ്റിൽമെന്റ് സ്കൂളിന് മുന്നിൽ വച്ചാണ് സുജിത്തിന് അപകടം സംഭവിച്ചത്. സ്വകാര്യ ആശുപത്രിയിൽ ചികിത്സയിലിരിക്കെ ഉച്ചയോടെയായിരുന്നു അന്ത്യം. സംസ്കാര ചടങ്ങുകൾ ഇന്ന് വൈകിട്ട് അഞ്ചിന് തോന്ന്യക്കാവ് ശ്മശാനത്തിൽ നടക്കും.
യുവതാരങ്ങൾ അണിനിരന്ന കിനാവള്ളി എന്ന ചിത്രത്തിലൂടെയാണ് സുജിത് രാജ് അഭിനയ രംഗത്തെത്തിയത്. ചിത്രത്തിൽ സുജിത് ഒരു ഗാനവും ആലപിച്ചിട്ടുണ്ട്. രംഗീല, മാരത്തോൺ എന്നീ ചിത്രങ്ങളിലും സുജിത് അഭിനയിച്ചിട്ടുണ്ട്. ചെറുപ്പം മുതൽ ഭരതനാട്യം, കർണാടക സംഗീതം എന്നീ മേഖലയിലും സുജിത് തന്റെ കഴിവ് തെളിയിച്ചിട്ടുണ്ട്.
നടി സുരഭി സന്തോഷ് ഉൾപ്പെടെയുളള താരങ്ങൾ സുജിത്തിന്റെ വിയോഗത്തിൽ ദുഃഖം രേഖപ്പെടുത്തി. സുജിത്തിന്റെ കഴിവുകൾ ലോകം അംഗീകരിക്കുന്നത് കാണാൻ താൻ ഏറെ ആഗ്രഹിച്ചിരുന്നെന്ന് സുരഭി ഇൻസ്റ്റഗ്രാമിൽ പറഞ്ഞു. പകരം വയ്ക്കാനില്ലാത്ത ശൂന്യത അവശേഷിപ്പിച്ചാണ് സുജിത് മടങ്ങുന്നതെന്നും താരം കൂട്ടിച്ചേർത്തു.