മുടികൊഴിച്ചിൽ എല്ലാ പ്രായത്തിലുമുള്ള ആളുകളെയും അലട്ടുന്ന പ്രശ്നമാണ്. സ്ഥിതിവിവരക്കണക്കുകൾ പ്രകാരം, 25 വയസിന് താഴെയുള്ള യുവാക്കളിൽ 13 ശതമാനം പേരിലും മുടികൊഴിച്ചിൽ അനുഭവിക്കുന്നതായി കാണാം. ഉദര സംബന്ധമായ പ്രശ്നങ്ങളുള്ള അതേ പ്രായത്തിലുള്ള 37 ശതമാനം പുരുഷൻമാർക്ക് മുടി കൊഴിയുന്നു. 35 വയസിന് താഴെയുള്ള 60 ശതമാനം പുരുഷന്മാരിലും 50 വയസിന് താഴെയുള്ള 80 ശതമാനം പുരുഷന്മാരിലും മുടികൊഴിച്ചിൽ അനുഭവിക്കുന്നു എന്നാണ് ഗവേഷണഫലങ്ങൾ വ്യക്തമാക്കുന്നത്.
മുൻപ് 50-കളുടെ അവസാനത്തിലും 60-കളിലുമായിരുന്നു പുരുഷന്മാർക്ക് കഷണ്ടി വന്നിരുന്നത്. ഇന്ന് മിക്ക യുവാക്കൾക്കും വളരെ ചെറുപ്പത്തിൽ തന്നെ മുടികൊഴിച്ചിൽ കണ്ടിവരുന്നുണ്ട്. പുരുഷന്മാർക്ക് മുടികൊഴിച്ചിൽ അനുഭവപ്പെടുന്നത് എന്തുകൊണ്ടാണെന്ന് അറിയാം…
ജനിതക കാരണങ്ങളാണ് പുരുഷന്മാർക്ക് മുടികൊഴിച്ചിൽ അനുഭവപ്പെടുന്നതിനുള്ള പ്രധാന കാരണായി വിലയിരുത്തുന്നത്. ഇത് കൂടാതെ ഭക്ഷണ ശീലങ്ങൾ, സമ്മർദ്ദം, മലിനീകരണം, ജീവിതശൈലി എന്നിവ മൂലം നഗരപ്രദേശങ്ങളിലെ പുരുഷൻമാർക്ക് മുടികൊഴിച്ചിൽ കൂടതലാണെന്ന് പഠനങ്ങൾ തെളിയിക്കുന്നു.
ജനിതക ഘടകങ്ങൾ : ആൻഡ്രോജെനെറ്റിക് അലോപ്പേഷ്യ അഥവാ പുരുഷ പാറ്റേൺ കഷണ്ടി, ജനിതക ഘടകങ്ങൾ മൂലമുണ്ടാകുന്ന സാധാരണ രോഗമാണ്. ഇത് സ്ത്രീകളെയും ബാധിക്കാം. പക്ഷേ ഇത് പൊതുവേ പുരുഷന്മാരെയാണ് കൂടുതൽ കണ്ടുവരുന്നത്. പുരുഷന്മാരിലെ കഷണ്ടിക്ക് പാരമ്പര്യവുമായി ബന്ധമുണ്ട്.
സമ്മർദ്ദം: സ്വാഭാവിക മുടി വളർച്ചയെ തടസപ്പെടുത്തുകയും മുടി കൊഴിച്ചിലിന് കാരണമാകുകയും ചെയ്യുന്ന പ്രധാന വില്ലനാണ് സമ്മർദ്ദം. ഭക്ഷണക്രമം പരിഷ്കരിക്കുക, വെള്ളം കുടിക്കുന്നത് വർദ്ധിപ്പിക്കുക, സമ്മർദ്ദം ഒഴിവാക്കുന്നതിന് യോഗയും മറ്റ് വ്യായാമങ്ങളും ചെയ്യുക.
ഹോർമോൺ പ്രശ്നങ്ങൾ : ഇന്ത്യയിലെ പുരുഷന്മാരിൽ മുടികൊഴിച്ചിലിനും കഷണ്ടിക്കുമുള്ള പ്രധാന കാരണങ്ങളിലൊന്നാണ് ഹോർമോൺ അസന്തുലിതാവസ്ഥ. കടുത്ത സമ്മർദ്ദം, തെറ്റായ ഭക്ഷണക്രമം എന്നിവ ഹോർമോൺ പ്രശ്നങ്ങൾ വഷളാകുന്നു.
പാരിസ്ഥിതിക കാരണങ്ങൾ: ഉയർന്ന ആർദ്രത, വരണ്ട കാലാവസ്ഥ, വായുവിന്റെ ഗുണനിലവാരം, പൊടി മലിനീകരണം എന്നിവ കഷണ്ടിയിലേക്ക് നയിക്കുന്ന പാരിസ്ഥിതിക ഘടകങ്ങളാണ്. പൊടി പറ്റിപ്പിടിക്കുന്നത്, മുടിയെ വരണ്ടതാക്കുകയും മുടി കൊഴിയാൻ ഇടയാക്കുകയും ചെയ്യുന്നു.
മുടി വളർച്ചയ്ക്ക് അനുയോജ്യമായ പ്രകൃതിദത്ത എണ്ണകൾ
- വെളിച്ചെണ്ണയിൽ ആൻ്റിഓക്സിഡൻ്റുകളും വിറ്റാമിൻ ഇയും അടങ്ങിയിട്ടുണ്ട്, ഇത് നിങ്ങളുടെ തലയോട്ടിയെ ആരോഗ്യകരമാക്കുകയും മുടി വളർച്ചയെ പ്രോത്സാഹിപ്പിക്കുകയും ചെയ്യുന്നു. എല്ലാത്തരം മുടിക്കും വെളിച്ചെണ്ണ അനുയോജ്യമാണ്.
- ബദാം ഓയിലിൽ മഗ്നീഷ്യം, വിറ്റാമിൻ ഇ എന്നിവ അടങ്ങിയിട്ടുണ്ട്, ഇത് മുടി കൊഴിച്ചിലിനെതിരെ പോരാടാൻ സഹായിക്കുന്നു.
- മുടികൊഴിച്ചിൽ തടയുന്നതിനും വളർച്ചയെ പ്രോത്സാഹിപ്പിക്കുന്നതിനുമുള്ള മികച്ച എണ്ണകളിൽ ഒന്നാണ് ആവണക്കെണ്ണ . മുടിയുമായി ബന്ധപ്പെട്ട എല്ലാ പ്രശ്നങ്ങൾക്കുമുള്ള മികച്ച പ്രകൃതിദത്ത പരിഹാര മാർഗമാണിത്. നരച്ചതും വരണ്ടതുമായ മുടിയ്ക്കും ആവണക്കെണ്ണ അനുയോജ്യമാണ്.
- സവാള നീരോ, സവാളയിട്ട് കാച്ചിയ എണ്ണയോ പതിവായി പുരട്ടുന്നത് മുടി വളർച്ചയെ പ്രോത്സാഹിപ്പിക്കുന്നു. പല ഹെയർ സെറങ്ങളിലും എണ്ണകളിലും സവാള അടങ്ങിയിട്ടുണ്ട്. കഷണ്ടി നിയന്ത്രിക്കുന്നതിനുള്ള അതിശയകരമായ ഗുണങ്ങൾ സവാളയ്ക്കുണ്ട്.
- ബ്രഹ്മി എണ്ണ രോമകൂപങ്ങളെ കട്ടിയാക്കുകയും പുനരുജ്ജീവിപ്പിക്കുകയും ചെയ്യുന്നു. തലയോട്ടിയിൽ പതിവായി മസാജ് ചെയ്യുന്നത് ഇരട്ടി ഫലം തരും. ബ്രഹ്മിയുടെ തണുപ്പ് താരൻ അകറ്റാൻ സഹായിക്കുന്നു.
- എള്ളെണ്ണയിൽ വൈറ്റമിൻ ഇ അടങ്ങിയിട്ടുണ്ട്. മുടി വളർച്ചയ്ക്കുള്ള ആയുർവേദ എണ്ണകളിൽ പ്രധാന ഘടകമാണ് ഇത് . എള്ളെണ്ണ മുടിക്ക് തിളക്കവും ആരോഗ്യവും പ്രദാനം ചെയ്യുന്നു.
