ബെംഗളൂരു: തോൽവികളിൽ മനംമടുത്ത റോയൽ ചലഞ്ചേഴ്സ് ബംഗളൂരുവിന് വീണ്ടും തിരിച്ചടി. തന്റെ മോശം ഫോം കാരണം ഈ സീസണിൽ നിന്ന് ഇടവേള എടുക്കാനൊരുങ്ങുകയാണ് ഓസ്ട്രേലിയൻ സൂപ്പർതാരം ഗ്ലെൻ മാക്സ്വെൽ. ഇന്നലെ സണ്റൈസേഴ്സ് ഹൈദരാബാദിനെതിരായ മത്സരത്തിന് ശേഷം മാധ്യമങ്ങളോട് സംസാരിക്കവേയാണ് അദ്ദേഹം ഇക്കാര്യം വെളിപ്പെടുത്തിയത്.
‘‘എനിക്ക് വ്യക്തിപരമായി വളരെ എളുപ്പമുള്ള തീരുമാനമായിരുന്നു. പുതിയ ആരെയെങ്കിലും പരീക്ഷിക്കാൻ കഴിഞ്ഞ കളിക്കുശേഷം ഞാൻ ക്യാപ്റ്റനോടും പരിശീലകരോടും നിർദേശിച്ചു. ചെറിയ ഇടവേളയെടുത്ത് ശരീരവും മനസും ശരിയാക്കേണ്ടതുണ്ട്. പവര്പ്ലേയ്ക്കു ശേഷം ബാറ്റിങ് പ്രകടനത്തിൽ ആർസിബി പിന്നോട്ടുപോകുന്നുണ്ട്. ആ സ്ഥാനത്തായിരുന്നു കഴിഞ്ഞ കുറച്ചു സീസണുകളായി എന്റെ കരുത്ത്. ബാറ്റിങ്ങിൽ മികച്ച രീതിയില് ഒന്നും ചെയ്യാൻ എനിക്കു സാധിക്കുന്നില്ല. മത്സരഫലങ്ങളും പോയിന്റ് പട്ടികയിൽ ടീമിന്റെ സ്ഥാനവും കൂടി നോക്കിയാൽ ഒരു ബ്രേക്ക് എടുക്കാനുള്ള സമയം ഇതാണെന്നു തോന്നുന്നു.മറ്റുള്ളവർക്കു കൂടി കഴിവു തെളിയിക്കാനുള്ള അവസരം നൽകേണ്ട സമയമാണിത്. മറ്റാർക്കെങ്കിലും അവരുടെ സ്ഥാനം ഉറപ്പിക്കാൻ സാധിക്കട്ടെ” മത്സരശേഷമുള്ള വാർത്താ സമ്മേളനത്തിൽ മാക്സ്വെൽ പറഞ്ഞു.
ഇന്നലെ ചിന്നസ്വാമി സ്റ്റേഡിയത്തിൽ നടന്ന ഹൈ വോൾട്ടേജ് മത്സരത്തിൽ സൺ റൈസേഴ്സ് ഹൈദരാബാദ് ബെംഗളൂരുവിനെ 25 റൺസിന് പരാജയപ്പെടുത്തിയിരുന്നു. മത്സരത്തിൽ പ്ലെയിങ് ഇലവനിൽ 35 കാരനായ മാക്സ്വെൽ ഇല്ലാതിരുന്നതും ആരാധകരെ നിരാശപ്പെടുത്തിയിരുന്നു.
