തിയേറ്ററുകളിൽ തരംഗം സൃഷ്ടിച്ച ആദിത്യ സുഹാസ് ജാംബലെയുടെ ‘ആർട്ടിക്കിൾ 370’ ഈ ആഴ്ച ഒടിടിയിൽ എത്തും. ഏപ്രില് 19ന് ജിയോ സിനിമയിലൂടെയാണ് ചിത്രം എത്തുന്നത്.
കശ്മീരിലെ വിഘടനവാദവും തീവ്രവാദവും അവസാനിപ്പിക്കാൻ ആർട്ടിക്കിൾ 370 പിൻവലിച്ച നടപടിയും തുടർ സംഭവ വികാസങ്ങളുമാണ് സിനിമ. ആർട്ടിക്കിൾ 370 പിൻവലിക്കാൻ കേന്ദ്രസർക്കാർ സ്വീകരിച്ച മുന്നൊരുക്കങ്ങളും ഇതിനായി രഹസ്യമായി താഴ്വരയിൽ പ്രവർത്തിച്ച സുരക്ഷാ സേനയിലെ പ്രത്യേക ടീമിന്റെയും കഥയാണ് ‘ആർട്ടിക്കിൾ 370’.
ഫെബ്രുവരി 23-ന് തിയേറ്ററുകളിലെത്തിയ ചിത്രത്തിന് പ്രേക്ഷകരിൽ നിന്ന് മികച്ച പ്രതികരണമാണ് ലഭിച്ചത്. ചിത്രത്തിൽ നടി യാമി ഗൗതം ശ്രദ്ധേയ പ്രകടനമാണ് കാഴ്ചവച്ചത്. സൂനി ഹക്സർ എന്ന രഹസ്യാന്വേഷണ ഉദ്യോഗസ്ഥയുടെ വേഷത്തിലാണ് താരം എത്തിയത്.
മലയാളികളുടെ പ്രിയ താരം പ്രിയാമണിയും ശ്രദ്ധേയമായ മറ്റൊരു വേഷം കൈകാര്യം ചെയ്തിട്ടുണ്ട്. ചിത്രം പൂർണമായും ജമ്മു കശ്മീരിലാണ് ചിത്രീകരിച്ചത്. ആദിത്യ ധർ, അർജുൻ ധവാൻ, സംവിധായകൻ ആദിത്യ എന്നിവർ ചേർന്നാണ് ചിത്രത്തിന്റെ രചന നിർവഹിച്ചിരിക്കുന്നത്. ജ്യോതി ദേശ്പാണ്ഡെ, ആദിത്യ ധാർ, ലോകേഷ് ധാർ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്.
