ആലപ്പുഴ: ആലപ്പുഴയിൽ പക്ഷിപ്പനി സ്ഥിരീകരിച്ചു. കുട്ടനാട്ടിൽ എടത്വ, ചെറുതന എന്നിവിടങ്ങളിൽ കഴിഞ്ഞ ദിവസം താറാവുകൾ കൂട്ടത്തോടെ ചത്തിരുന്നു. ഇതേ തുടർന്ന് ഭോപ്പാലിലെ ലാബിൽ നടത്തിയ പരിശോധനയിലാണ് പക്ഷിപ്പനി സ്ഥിരീകരിച്ചത്. ഇവിടെ നിന്നും അയച്ച മൂന്ന് സാമ്പിളുകളും H5N1 പോസിറ്റീവായതോടെയാണ് പക്ഷിപ്പനി സ്ഥിരീകരിച്ചത്.
H5N1 വൈറസ്…
പക്ഷികളെ കൂടുതലായി ബാധിക്കുന്ന വൈറസാണിത്. ഇവ മനുഷ്യരിലേക്ക് ബാധിക്കുന്നതിനുള്ള സാധ്യതയേറെയാണ്. രോഗം ബാധിച്ച പക്ഷികൾ അല്ലെങ്കിൽ അവയുടെ കാഷ്ഠം, മലിനമായ പ്രതലങ്ങൾ എന്നിവ തമ്മിൽ നേരിട്ടുള്ള സമ്പർക്കം വൈറസ് പടരുന്നതിനുള്ള വഴികളാണ്.
ലക്ഷണങ്ങൾ…
ചുമ, തൊണ്ടവേദന, മൂക്കൊലിപ്പ്, ശരീരവേദന, ക്ഷീണം, ശ്വാസതടസ്സം അല്ലെങ്കിൽ ശ്വസന ബുദ്ധിമുട്ട് എന്നിവ ഇതിന്റെ ലക്ഷണങ്ങളാണ്. വയറിളക്കം, ഓക്കാനം, അപസ്മാരം എന്നിവയും സാധാരണ രീതിയിൽ പ്രകടമാകുന്ന ലക്ഷണങ്ങളാണ്.
രണ്ട് മുതൽ എട്ട് ദിവസത്തിനുള്ളിലാകും രോഗലക്ഷണങ്ങൾ ആരംഭിക്കുക. സാധാരണ പനി എന്ന രീതിയിലാകും ലക്ഷണങ്ങൾ കണ്ടു തുടങ്ങുക. ചുമ, പനി, തൊണ്ടവേദന, പേശിവേദന, തലവേദന, ശ്വാസംമുട്ടൽ എന്നിവ ഉണ്ടാകും.
