ആലപ്പുഴ: ബിജെപി അനുകൂല നിലപാടുമായി ആലപ്പുഴ ലത്തീൻ രൂപത വക്താവ്. ബിജെപി നേതൃത്വം കൊടുക്കുന്ന സർക്കാരിന്റെ വികസന പ്രവർത്തനങ്ങൾ കണ്ടില്ല എന്ന് നടിക്കാൻ കഴിയില്ലെന്ന് ജീവദീപ്തി ഏപ്രിൽ ലക്കത്തിൽ പ്രസിദ്ധീകരിച്ച ലേഖനത്തിലാണ് ആലപ്പുഴ ലത്തീൻ രൂപത വക്താവ് ഫാദർ സേവ്യർ കുടിയാംശ്ശേരി നിലപാട് വ്യക്തമാക്കിയത്. ‘ഇന്ത്യയെ ആര് നയിക്കണം’ എന്ന പേരിൽ പ്രസിദ്ധീകരിച്ച ലേഖനത്തിൽ ബിജെപിയുടെ വിദേശനയത്തേയും പ്രശംസിക്കുന്നുണ്ട്. കോൺഗ്രസിനെതിരെയും കമ്യൂണിസ്റ്റ് പാർട്ടിക്കെതിരെയും ലേഖനത്തിൽ വിമർശനം ഉന്നയിക്കുന്നുണ്ട്.
യുഡിഎഫ്, എൽഡിഎഫ് സഖ്യങ്ങൾ സെക്കുലർ ആണെന്ന് ആർക്കെങ്കിലും പറയാനാകുമോ എന്നും, രണ്ട് പാർട്ടികളും വർഗീയ പ്രീണനമാണ് തുടരുന്നതെന്നും അദ്ദേഹം വിമർശിക്കുന്നു. ”വർഗീയതയാണ് രണ്ട് പാർട്ടികളുടേയും അന്തരാത്മാവ്. യുഡിഎഫ് മുസ്ലീം ലീഗിന് അടിയറവ് പറഞ്ഞിരിക്കുന്നു എന്നാണ് ആരോപണം. ഇടതുപക്ഷവും ഇക്കാര്യത്തിൽ മോശമല്ല. മുസ്ലീം ലീഗിനെ പ്രലോഭിപ്പിച്ച് തങ്ങളുടെ ക്യാമ്പിലെത്തിക്കാനുള്ള തത്രപ്പാടിലാണ് അവർ. നമ്മൾ ജനിച്ചു വളർന്ന കോൺഗ്രസ് ഇന്നുണ്ടോ എന്നാണ് പുതുതലമുറ ചോദിക്കുന്നത്. അട്ടിപ്പേറായി കിടന്ന് കോൺഗ്രസിന് മാത്രം വോട്ട് ചെയ്യാൻ വേണ്ടി ഈ പാർട്ടി നമുക്കെന്ത് ചെയ്തു” എന്നും അദ്ദേഹം ചോദിക്കുന്നു.
”ഒരു കാലത്ത് നമുക്ക് കമ്യൂണിസ്റ്റുകാരെ കണ്ടുകൂടായിരുന്നു. ഇപ്പോൾ അയിത്തമൊക്കെ പോയി. എന്നാൽ രാജ്യരക്ഷയും ജനക്ഷേമവും അവർക്കിന്ന് കൈമോശം വന്നിരിക്കുന്നു. അവരിന്ന് പാർട്ടിക്കാരെ മാത്രമേ സേവിക്കൂ എന്നായിരിക്കുന്നു. അതിന് വേണ്ടി ഏത് നിയമവും കാറ്റിൽ പറത്തും. മാത്രമല്ല ദേശീയ തലത്തിൽ പ്രതീക്ഷയില്ലാത്ത പാർട്ടിയാണിത്. അതിലുമുപരിയായി കുറേ ക്രിമിനലുകളുടെ സങ്കേതമായി പാർട്ടി മാറിക്കഴിഞ്ഞു. കമ്യൂണിസം അറിയുന്നവർ ആരും ആ പാർട്ടിയിലില്ല. അതിനാൽ അവരെ അവരുടെ വഴിക്ക് വിടുക.
ബിജെപി കരുത്തോടെ ഇപ്പോൾ ഇന്ത്യ ഭരിക്കുന്നു. അവർ നേതൃത്വം കൊടുക്കുന്ന വികസന പ്രവർത്തനങ്ങൾ കണ്ടില്ലെന്ന് നടിക്കാനാകില്ല. വിദേശനയം ശ്ലാഘനീയമാണ്. മോദിക്ക് വിദേശത്തുള്ള സ്വീകാര്യത ചെറുതൊന്നുമല്ല. അഴിമതി ഇല്ലെന്ന് വേണം കരുതാൻ. ബിജെപി ഇക്കുറി കേരളത്തിൽ അക്കൗണ്ട് തുറക്കാനാണ് സാധ്യത. കരുണാകരന്റെ മകൾ പത്മജ, എ.കെ ആന്റണിയുടെ മകൻ അനിൽ കെ ആന്റണി എന്നിവരെല്ലാം ബിജെപിയിലേക്ക് ചേക്കേറി. ഇനിയും അയിത്തം കൽപ്പിച്ച് പുറത്ത് നിർത്തിയാൽ നാളെ അവർ നമ്മളെ പുറത്ത് നിർത്തും. അതിലും നല്ലത് നമുക്ക് അകത്ത് കടക്കുകയല്ലേ വേണ്ടതെന്നും” ലേഖനത്തിൽ ചോദിക്കുന്നു.
