ന്യൂഡൽഹി : തർക്കത്തിലുള്ള ജൽഗാവിലെ എരണ്ടോൾ താലൂക്കിലെ മസ്ജിദിന്റെ താക്കോൽ മുനിസിപ്പൽ കൗൺസിൽ അധികൃതർക്ക് കൈമാറണമെന്ന് സുപ്രീം കോടതി . പ്രഭാത നമസ്കാരം ആരംഭിക്കുന്നതിന് കുറച്ച് സമയം മുമ്പ് ഗേറ്റ് തുറന്ന് നൽകിയാൽ മതിയെന്നും സുപ്രീം കോടതി വ്യക്തമാക്കി.
ജൽഗാവ് മസ്ജിദിന്റെ താക്കോൽ ഏപ്രിൽ 13നകം കൗൺസിലിലേക്ക് തിരികെ നൽകണമെന്ന ബോംബെ ഹൈക്കോടതിയുടെ ഉത്തരവിനെതിരെ ജുമ്മാ മസ്ജിദ് ട്രസ്റ്റ് കമ്മിറ്റി നൽകിയ അപ്പീലിലാണ് ജസ്റ്റിസുമാരായ സൂര്യകാന്ത്, കെ വി വിശ്വനാഥൻ എന്നിവരടങ്ങിയ ബെഞ്ച് വിധി പറഞ്ഞത് .കൂടാതെ, ഇനിയൊരു ഉത്തരവുണ്ടാകുന്നതുവരെ മസ്ജിദ് കോമ്പൗണ്ട് മുനിസിപ്പൽ കൗൺസിൽ നിയന്ത്രണത്തിലായിരിക്കണമെന്നും കോടതി വ്യക്തമാക്കി.
ക്ഷേത്രഭൂമിയിലാണ് മസ്ജിദ് നിർമ്മിച്ചിരിക്കുന്നതെന്നും , പ്രാദേശിക മുസ്ലീം സമുദായം കയ്യേറ്റം നടത്തിയെന്നും ആരോപിച്ച് ഹിന്ദു സംഘടനയായ പാണ്ഡവ്വാഡ സംഘർഷ് സമിതി നൽകിയ പരാതിയുടെ പശ്ചാത്തലത്തിലാണ് ഈ ഉത്തരവ്. ക്ഷേത്രങ്ങളും സ്മാരകങ്ങളും എല്ലാത്തരം തടസ്സങ്ങളിൽ നിന്നും മുക്തമായിരിക്കും, കൂടാതെ ഹിന്ദുക്കൾക്കും , മറ്റ് വിവിധ മതവിഭാഗങ്ങളിൽപ്പെട്ട ആളുകൾക്കും ഇവിടം സന്ദർശിക്കാൻ അനുവദിക്കുകയും ചെയ്യണമെന്നും കോടതി വ്യക്തമാക്കിയിട്ടുണ്ട്.
കഴിഞ്ഞ വർഷം ജൂലൈയിൽ തർക്കത്തിലുള്ള പള്ളി ഭരണകൂടം താൽക്കാലികമായി അടച്ചിരുന്നു . സംസ്ഥാന പുരാവസ്തു വകുപ്പിന്റെ കീഴിൽ സംരക്ഷിച്ചിരിക്കുന്ന സ്ഥലങ്ങളിൽ പ്രാർത്ഥനകൾ ഉടൻ നിരോധിച്ചുകൊണ്ട് ക്രിമിനൽ നടപടി ചട്ടത്തിലെ സെക്ഷൻ 144 പ്രകാരം ഉത്തരവ് പുറപ്പെടുവിച്ചു.
പ്രദേശത്ത് പോലീസ് വിന്യാസത്തിന് കലക്ടർ നിർദ്ദേശം നൽകുകയും ‘തർക്കമുള്ള പള്ളി’യുടെ ചുമതല ഏറ്റെടുക്കുകയും ചെയ്തിരുന്നു.
