സിനിമയിൽ സാമ്പത്തികമായി ഇന്നും താൻ സേഫ് അല്ലെന്ന് നടി മാല പാർവ്വതി. ഒരുപാട് പണം ചോദിച്ചാൽ സിനിമയിൽ അവസരം കിട്ടില്ലെന്നും നടി പറഞ്ഞു. സിനിമയിൽ അഭിനയിക്കുന്ന എല്ലാവരുടെയും അവസ്ഥ ഇത് തന്നെയാണെന്നും മാലപാർവ്വതി വ്യക്തമാക്കി. ഒരു ഓൺലൈൻ മാദ്ധ്യമത്തിന് നൽകിയ അഭിമുഖത്തിലായിരുന്നു മാലാ പാർവ്വതി ഇക്കാര്യങ്ങൾ പറ‍ഞ്ഞത്.
‘സാമ്പത്തികമായി ഇന്നും സിനിമയിൽ ഞാൻ സേഫ് അല്ല. എല്ലാ മാസവും ഒന്നാം തീയതി വാടക നൽകാനും കൂടെ ജോലി ചെയ്യുന്നവർക്ക് ശമ്പളം നൽകാനും എന്റെ കയ്യിൽ പണം ഉണ്ടോന്ന് ചോദിച്ചാൽ ഇല്ലെന്ന് പറയേണ്ടി വരും. കിട്ടുന്ന പൈസ മുഴുവനും എനിക്ക് സേവ് ചെയ്യാൻ പറ്റില്ല. ഒരുപാട് ചിലവുണ്ട്. എന്നെ ആശ്രയിച്ച് നിൽക്കുന്നവരെ സഹായിക്കണം. അതുകൊണ്ടാണ് കഴിയാത്തത്.
പിന്നെ സിനിമയിൽ ഒരുപാട് പണമൊന്നും ചോദിക്കാൻ സാധിക്കില്ല. എന്നെ മിക്കവാറും എല്ലാവരും വിളിക്കുമ്പോൾ നിങ്ങളുടെ ബജറ്റ് പറയാനാണ് ഞാൻ പറയുന്നത്. അങ്ങനെ പറഞ്ഞില്ലെങ്കിൽ നമുക്ക് സിനിമയിൽ അവസരം കിട്ടില്ല. സിനിമയിൽ പൈസ കൂട്ടി ചോദിച്ചാൽ അവസരം കിട്ടില്ല. അവിടെ ആണ്, പെണ്ണ് എന്നൊന്നുമില്ല. സിനിമയിൽ പ്രത്യേകിച്ചൊരു ബഡ്ജറ്റൊന്നും നമുക്ക് ചോദിക്കാൻ കഴിയില്ല. പ്രത്യേകിച്ച് മലയാളം സിനിമയിൽ.
എഗ്രിമെന്റൊക്കെ ഒപ്പിട്ടാൽ ഇത്ര രൂപ കിട്ടുമെന്നെങ്കിലും അറിയാം. അല്ലെങ്കിൽ പൈസ കിട്ടുമോ എന്ന് തന്നെ ഉറപ്പ് കാണില്ല. സിനിമയിൽ നിൽക്കുക എന്നത് നിരന്തരമായ ഒരു ഫൈറ്റാണ്.’- മാലാ പാർവ്വതി പറഞ്ഞു .
