മുംബൈ: ബോളിവുഡ് താരം പങ്കജ് ത്രിപാഠിയുടെ സഹോദരീ ഭർത്താവ് രാകേഷ് തിവാരി വാഹനാപകടത്തിൽ കൊല്ലപ്പെട്ടു. സംഭവത്തിൽ സഹോദരി സബിത തിവാരിക്ക് സാരമായി പരിക്കേറ്റു. ഝാർഖണ്ഡിലെ ധൻബാദിൽ വച്ച് ഇന്നലെയായിരുന്നു അപകടം സംഭവിച്ചത്. വൈകിട്ട് 4.30ന് ഡൽഹി-കൊൽക്കത്ത ദേശീയ പാതയിൽ വച്ച് കാർ ഡിവൈഡറിൽ ഇടിച്ചാണ് അപകടം സംഭവിച്ചത്.
ബിഹാറിലെ ഗോപാൽഗഞ്ച് ജില്ലയിൽ നിന്ന് പശ്ചിമ ബംഗാളിലേക്ക് വരുമ്പോഴായിരുന്നു ദമ്പതികൾ അപകടത്തിൽപ്പെട്ടത്. ഇവരെ ഉടൻതന്നെ അടുത്തുള്ള സ്വകാര്യ ആശുപത്രിയിൽ എത്തിക്കുകയായിരുന്നു. ആശുപത്രിയിൽ എത്തിയപ്പേഴേക്കും രാകേഷ് തിവാരി മരിച്ചിരുന്നു. സബിത തിവാരിക്ക് കാലിന് ഒടിവ് സംഭവിച്ചിട്ടുണ്ട്. ഇവർ അപകടനില തരണം ചെയ്തതായും ആശുപത്രിവൃത്തങ്ങൾ അറിയിച്ചു.
സംഭവ സമയത്ത് രാകേഷ് തിവാരി തന്നെയാണ് കാർ ഓടിച്ചിരുന്നത്. നിയന്ത്രണം നഷ്ടപ്പെട്ട കാർ ഡിവൈഡറിൽ ഇടിച്ച് മറിയുകയായിരുന്നെന്നും പൊലീസ് പറഞ്ഞു. പൊലീസ് കേസെടുത്ത് അന്വേഷണം ആരംഭിച്ചു.
