ഐപിഎല്ലിലെ ആദ്യപകുതിയിൽ താൻ നേരിട്ട പ്രതിസന്ധി മറികടക്കാൻ സഹായിച്ച എല്ലാ മുതിർന്ന താരങ്ങൾക്കും നന്ദി പറഞ്ഞ് യുവതാരം യശസ്വി ജയ്സ്വാൾ. മുംബൈയ്ക്കെതിരായ മത്സരത്തിൽ സെഞ്ച്വറി നേടിയതിന് പിന്നാലെയാണ് താരം സീനിയർ താരങ്ങളോട് നന്ദി പറഞ്ഞത്.
ഐപിഎല്ലിലെ ഈ സെഞ്ച്വറി നേട്ടം തനിക്ക് വിശ്വസിക്കാവുന്നതിനും അപ്പുറമാണ്. കഴിഞ്ഞ കുറച്ച് മത്സരങ്ങൾ എന്നെ സംബന്ധിച്ചിടത്തോളം വലിയ ബുദ്ധിമുട്ടേറിയതായിരുന്നു. പക്ഷേ ഇത് ക്രിക്കറ്റാണ്, ഉയർച്ചകളും താഴ്ചകളും ഉണ്ടാകും. ഇത് മറികടക്കാൻ എന്നെ സഹായിച്ച സീനിയർമാരായ രോഹിത് ഭയ്യ, വിരാട് ഭയ്യ, സഞ്ജു ഭയ്യ, സംഗ സർ എന്നിവർക്ക് ഞാൻ നന്ദി പറയുന്നു. അവരാണ് എന്റെ പ്രകടനത്തിന് പിന്നിൽ. അവർ എന്നെ നയിച്ച രീതി അതിശയിപ്പിക്കുന്നതാണെന്നും യശസ്വി പറഞ്ഞു.
കഴിഞ്ഞ മത്സരങ്ങളിൽ തിളങ്ങാതിരുന്നിട്ടും എന്നെ വിശ്വസിച്ചതിനും വീണ്ടും അവസരം നൽകിയതിനും നായകൻ സഞ്ജുവിനോടും കോച്ച് കുമാർ സംഗാരയോടും കടപ്പെട്ടിരിക്കുന്നു. പരിശീലന സമയത്ത് മികച്ച പ്രകടനം പുറത്തെടുക്കുന്നുവെന്നും വീഴ്ചകളിൽ നിന്ന് പാഠം ഉൾക്കൊള്ളുന്നുവെന്നും ഉറപ്പാക്കാൻ ഇരുവരും ശ്രദ്ധിച്ചു. ഗ്രൗണ്ടിൽ ആത്മവിശ്വാസം വീണ്ടെടുക്കാൻ ഇതെല്ലാം സഹായിച്ചുവെന്നും പോസ്റ്റ് മാച്ച് പ്രസന്റേഷനിൽ യശസ്വി കൂട്ടിച്ചേർത്തു.
മുംബൈ ഇന്ത്യൻസിനെതിരായ മത്സരത്തിൽ 9 വിക്കറ്റിന്റെ വിജയം രാജസ്ഥാൻ സ്വന്തമാക്കിയപ്പോൾ ഓപ്പണറായ ജയ്സ്വാൾ 60 പന്തിൽ 104 റൺസെടുത്ത് പുറത്താകാതെ നിന്നു. സീസണിൽ താരത്തിന്റെ ആദ്യത്തെ സെഞ്ച്വറിയാണിത്. ഏഴ് സിക്സുകളും ഒമ്പത് ബൗണ്ടറികളും അടങ്ങുന്നതായിരുന്നു താരത്തിന്റെ ഇന്നിംഗ്സ്.
