ന്യൂഡൽഹി : ശ്രീരാമചിത്രം ആലേഖനം ചെയ്ത പ്ലേറ്റുകളിൽ ബിരിയാണി വിളമ്പിയ കടയുടമ പിടിയിൽ . മതവികാരം വ്രണപ്പെടുത്താൻ ശ്രമിച്ചതിന്റെ പേരിലാണ് ഇയാളെ പിടികൂടിയത് . വടക്കുപടിഞ്ഞാറൻ ഡൽഹിയിലെ ജഹാംഗീർപുരിയിലാണ് സംഭവം .
ബിരിയാണി കടയിൽ സൂക്ഷിച്ചിരുന്ന ഡിസ്പോസിബിൾ പ്ലേറ്റുകളിൽ ശ്രീരാമന്റെ ഫോട്ടോ പ്രാദേശിക ഹിന്ദു സംഘടനകൾ ശ്രദ്ധിച്ചതോടെയാണ് സംഭവം പുറത്തറിഞ്ഞത്. തുടർന്ന്, ഇതേ ചൊല്ലി അവർ കച്ചവടക്കാരനുമായി സംസാരിച്ചു. ഉപയോഗിച്ച പ്ലേറ്റുകൾ ചവറ്റുകുട്ടകളിൽ ഉപേക്ഷിച്ചതായും കണ്ടെത്തി . കടയ്ക്ക് സമീപം സംഘർഷാവസ്ഥ ഉടലെടുത്തതോടെ പൊലീസ് സ്ഥലത്തെത്തി . ശ്രീരാമന്റെ ഫോട്ടോ പതിച്ച പ്ലേറ്റുകളുടെ പാക്കറ്റ് കണ്ടെടുത്തു. പ്രതിയെ കസ്റ്റഡിയിലെടുക്കുകയും ചെയ്തു.
അമി ഗണത്രയുടെ ‘രാമായണം അൺറാവൽഡ്’ എന്ന പുസ്തകത്തിന്റെ പുറംചട്ടയാണ് പ്ലേറ്റുകളിൽ ഉണ്ടായിരുന്നത്. സംഭവത്തിൽ വ്യാപക പ്രതിഷേധവും കുറ്റക്കാർക്കെതിരെ നടപടി വേണമെന്ന ആവശ്യവും ഉയർന്നിരുന്നു. ഇത്തരത്തിലുള്ള ആയിരം പ്ലേറ്റുകളാണ് ഇയാൾ ബിരിയാണി വിളമ്പാനായി വാങ്ങിയിരുന്നത് .