ഛത്രപതി ശിവാജി മഹാരാജിന്റെ പുത്രൻ ഛത്രപതി സംഭാജി മഹാരാജിന്റെ കഥ പറയുന്ന ഛാവയിലെ ലൊക്കേഷൻ ചിത്രങ്ങൾ സമൂഹമാദ്ധ്യമങ്ങളിൽ. ഛത്രപതി സംഭാജി മഹാരാജിന്റെ വേഷത്തിലുളള നടൻ വിക്കി കൗശലിന്റെ ചിത്രങ്ങളാണ് സമൂഹമാദ്ധ്യമങ്ങളിൽ പ്രത്യക്ഷപ്പെട്ടത്. ചിത്രങ്ങൾ ചോർന്നതാണോ ഔദ്യോഗികമായി പുറത്തുവിട്ടതാണോയെന്ന് വ്യക്തത വന്നിട്ടില്ല.
നീണ്ടമുടിയും താടിയും വളർത്തിയ കോസ്റ്റിയൂമിലാണ് വിക്കി കൗശൽ ചിത്രങ്ങളിലുളളത്. ചരിത്ര പുരുഷനിലേക്കുളള വിക്കിയുടെ വേഷപ്പകർച്ചയ്ക്ക് വലിയ കൈയ്യടിയാണ് സോഷ്യൽ മീഡിയയിൽ ലഭിക്കുന്നത്. പഴയ കാലത്ത വേഷവിധാനങ്ങളെ അനുസ്മരിപ്പിക്കുന്ന ലുക്കിലാണ് വിക്കി. കഴുത്തിൽ രുദ്രാക്ഷമാലകളും മുടി ഉച്ചിയിൽ ഉയർത്തികെട്ടിവെച്ചിരിക്കുന്നതും നെറ്റിയിൽ കുറിയും കാണാം.
രശ്മിക മന്ദാനയാണ് വിക്കിയുടെ നായികയായി ചിത്രത്തിലെത്തുന്നത്. ഛത്രപതി സംഭാജി മഹാരാജിന്റെ പത്നി യേശുഭായ് ഭോൻസാലെയുടെ വേഷമാണ് രശ്മിക അവതരിപ്പിക്കുന്നത്. ലുക്കാ ചുപ്പി, മിമി തുടങ്ങിയ ചിത്രങ്ങൾ സംവിധാനം ചെയ്ത ലക്ഷ്മൺ ഉതേകറാണ് ചിത്രം സംവിധാനം ചെയ്യുന്നത്. കഴിഞ്ഞ ഒക്ടോബറിലാണ് ഛാവയുടെ പ്രൊഡക്ഷൻ ജോലികൾ ആരംഭിച്ചത്.
സംഭാജി മഹാരാജായി വേഷമിടാൻ വലിയ തയ്യാറെടുപ്പാണ് വിക്കി നടത്തിയത്. വാൾ പയറ്റും കുതിര സവാരിയുമൊക്കെ നാല് മാസത്തോളം എടുത്ത്് പരിശീലിച്ചിരുന്നു. ഡിസംബറിൽ ഛാവയുടെ സെറ്റിൽ നിന്നുളള ചിത്രം വിക്കി നേരിട്ട് പോസ്റ്റ് ചെയ്തിരുന്നു. താൻ ചെയ്തിട്ടുളള ഏറ്റവും ദൈർഘ്യമേറിയ ആക്ഷൻ സീക്വൻസോടെയാണ് ഈ വർഷം അവസാനിക്കുന്നതെന്ന കുറിപ്പോടെയാണ് ചിത്രം പുറത്തുവിട്ടത്.
ദിനേശ് വിജന്റെ മഡോക്ക് ഫിലിംസിന്റെ ബാനറിലാണ് ചിത്രം നിർമിക്കുന്നത്. ഡിസംബർ ആറിനാണ് ചിത്രം തിയേറ്ററുകളിലെത്തുക. ഛവ എന്ന ചിത്രത്തിന് പുറമേ ‘ബാഡ് ന്യൂസ്’, ‘ലവ് ആൻജ് വാർ’എന്നിവയും വിക്കിയുടേതായി അണിയറയിൽ ഒരുങ്ങുന്നുണ്ട്.
മറാഠാ സാമ്രാജ്യത്തിന്റെ രണ്ടാമത്തെ ഭരണാധികാരി ഛത്രപതി ശിവാജിയുടെ മരണശേഷം പിൻഗാമിയായ സംഭാജി ഒമ്പത് വർഷക്കാലം ഭരിച്ചിരുന്നു. ഈ യോദ്ധാവിന്റെ കഥയാണ് പ്രേക്ഷകരുടെ മുന്നിലേക്ക് എത്താൻ പോകുന്നത്.
