ടി20 ലോകകപ്പ് ടീമിലേക്ക് ഹാർദിക് പാണ്ഡ്യയ്ക്ക് ഇടം ലഭിക്കുമോ എന്നതിൽ ഇപ്പോഴും അനിശ്ചിതത്വം തുടരുകയാണ്. താരമെന്ന നിലയിലും നായകനെന്ന നിലയിലും മുംബൈ ഇന്ത്യൻസിന് ജയം സമ്മാനിക്കാൻ സമ്മാനിക്കാൻ ഹാർദിക്കിന് കഴിഞ്ഞിട്ടില്ലെന്ന് മുൻ ഇന്ത്യൻ താരം ഇർഫാൻ പത്താൻ. ടീം മാനേജ്മെൻ്റ് ഹാർദിക്കിന് പ്രധാന്യം നൽകേണ്ട കാര്യമില്ലെന്നും പത്താൻ പറഞ്ഞു.
ഹാർദിക് പാണ്ഡ്യക്ക് എന്തിനാണ് ഇത്ര പ്രധാന്യം നൽകുന്നതെന്ന് വ്യക്തമാക്കണം. അദ്ദേഹത്തിന് ഇന്ത്യൻ ടീം ഇത്രയ്ക്ക് പ്രധാന്യം നൽകേണ്ട കാര്യമില്ല. കാരണം നമ്മൾ ഇതുവരെയും അദ്ദേഹത്തിന്റെ പ്രകടനത്തിലൂടെ ലോകകപ്പ് കിരീടം നേടിയിട്ടില്ല. നിങ്ങൾ ടീമിലെ നിർണായകമായ ഓൾറൗണ്ടറാണെങ്കിൽ അന്താരാഷ്ട്ര ക്രിക്കറ്റിലും അതേ രീതിയിൽ സ്വാധീനം ചെലുത്തേണ്ടതുണ്ട്. പക്ഷേ ഇതുവരെയും അന്താരാഷ്ട്രതലത്തിൽ മികച്ച പ്രകടനം പുറത്തെടുക്കാൻ പാണ്ഡ്യയ്ക്ക് സാധിച്ചിട്ടില്ല. ഐപിഎല്ലിലെയും അന്താരാഷ്ട്രതലത്തിലെയും പ്രകടനത്തിലെ വ്യത്യാസം എല്ലാവരെയും ആശയക്കുഴപ്പത്തിലാക്കുന്നുണ്ടെന്നും പത്താൻ പറഞ്ഞു.
വർഷം മുഴുവൻ കളിക്കേണ്ട താരമാണ് ഹാർദിക്. കളിക്കണോ വേണ്ടോയോ എന്ന് തീരുമാനിക്കാൻ അവനാകില്ല. വ്യക്തികൾക്കല്ല, ടീമിനാണ് മുൻഗണന നൽകേണ്ടത്. ഇന്ത്യൻ ക്രിക്കറ്റ് വ്യക്തികൾക്ക് മുൻഗണന നൽകുന്നത് നിർത്തണമെന്നും, ടൂർണമെന്റുകളിൽ പരാജയപ്പെടുന്നതിന്റെ പ്രധാന കാരണം അതാണെന്നും പത്താൻ കൂട്ടിച്ചേർത്തു. ഓസ്ട്രേലിയൻ ക്രിക്കറ്റ് ബോർഡ് ടീമിനാണ് പരിഗണന നൽകുന്നത്. ഒരു താരത്തിന് പകരം എല്ലാവരും ആ ടീമിൽ സൂപ്പർ താരങ്ങളാണെന്നും ടീം ഗെയിമാണ് വേണ്ടതെന്നും പത്താൻ വ്യക്തമാക്കി.
