അമ്മയുടെ കാൽതൊട്ട് വണങ്ങി; മകനെ ആലിം​ഗനം ചെയ്ത് തൊപ്പിയിൽ തൊട്ട് തൊഴുത് അഭിമാനത്തോടെ രജനി ത്രിപാഠി; നാവികസേന മേധാവിയുടെ സ്ഥാനാരോഹണ ചടങ്ങ്

ന്യൂഡൽഹി: നാവികസേന മേധാവിയായി ചുമതലയേൽക്കുന്നതിന് മുൻപ് അമ്മയുടെ കാൽതൊട്ട് വണങ്ങി അഡ്മിറൽ ദിനേശ് കുമാർ ത്രിപാഠി. മകന്റെ സ്ഥാനാരോഹണ ചടങ്ങിന് സാക്ഷ്യം വഹിക്കാൻ അമ്മ രജനി ത്രിപാഠിയും ഡൽഹിയിൽ എത്തിയിരുന്നു. മകനെ ആലിം​ഗനം ചെയ്ത് ചുംബനം നൽകി, തൊപ്പിയിൽ തൊട്ട് തൊഴുന്ന അമ്മയുടെ ദൃശ്യങ്ങൾ സമൂഹ മാദ്ധ്യമങ്ങൾ ഏറ്റെടുത്തു.

#WATCH | Delhi: Navy Chief Admiral Dinesh Tripathi seeks blessings from his mother Rajni Tripathi ahead of taking charge as the new Indian Navy chief. pic.twitter.com/mNo8EC8iQS

— ANI (@ANI) April 30, 2024

ദേശീയ യുദ്ധ സ്മാരകത്തിൽ പുഷ്ചചക്രം അർപ്പിച്ച ശേഷമാണ് ദിനേശ് കുമാർ ത്രിപാഠി നാവികസേനയുടെ ചുമതലയേറ്റെടുത്തത്. തുടർന്ന് അദ്ദേഹം ​ഗാർഡ് ഓഫ് ഓണർ സ്വീകരിച്ചു. ഡൽഹി സൗത്ത് ബ്ലോക്കിൽ സജ്ജീകരിച്ച പ്രത്യേക വേദിയിലാണ് ചടങ്ങുകൾ നടന്നത്.

മലയാളിയായ അഡ്മിറൽ ആർ ഹരികുമാറിന്റെ പിൻ​ഗാമിയായാണ് ദിനേശ് കുമാർ ത്രിപാഠി എത്തുന്നത്. 1985 ജൂലൈ 1 നാണ് നാവിക സേനയുടെ ഭാ​ഗമായത്. ഏഴിമലയിലെ നേവൽ അക്കാദമിയുടെ കമാൻഡൻറായും പ്രവർത്തിച്ചിട്ടുണ്ട്. കമ്മ്യൂണിക്കേഷന്‍ ആന്‍ഡ് ഇലക്ട്രോണിക് വാര്‍ഫെയര്‍ സ്പെഷ്യലിസ്റ്റായ അദ്ദേഹത്തിന് അതിവിശിഷ്ട സേവാ മെഡൽ, നൗ സേന മെഡൽ എന്നിവ നൽകി ആദരിച്ചിട്ടുണ്ട്.