ലോകത്തിലെ ഏറ്റവും ആഴമേറിയ നീല ഗർത്തം കണ്ടെത്തി ഗവേഷകർ. മെക്സിക്കോയിലാണ് പുതിയ ഗർത്തം കണ്ടെത്തിയിരിക്കുന്നത്. താം ജാ ബ്ലൂ ഹോൾ (TJBH) എന്ന് പേരിട്ടിരിക്കുന്ന സൈറ്റ് ഇപ്പോൾ ലോകത്തിലെ അറിയപ്പെടുന്ന ഏറ്റവും ആഴമേറിയ അണ്ടർവാട്ടർ സിങ്ക്ഹോൾ ആണ്. എന്നാൽ ഗവേഷകർക്ക് ഇതുവരെ ഇതിന്റെ അടിത്തട്ടിൽ എത്താൻ കഴിഞ്ഞിട്ടില്ല. താം ജാ ബ്ലൂ ഹോൾ സമുദ്രനിരപ്പിൽ നിന്ന് കുറഞ്ഞത് 1,380 അടി (420 മീറ്റർ) ആഴത്തിൽ നീണ്ടു കിടക്കുകയാണെന്നാണ് കണ്ടെത്തൽ.
യുകാറ്റൻ പെനിൻസുലയുടെ തെക്കുകിഴക്കൻ തീരത്തുള്ള കേറ്റുമൽ ഉൾക്കടലിലാണ് പുതിയതായി കണ്ടെത്തിയ ഈ നീല ഗർത്തം സ്ഥിതി ചെയ്യുന്നത്. 2021 ൽ ഗവേഷകർ കണ്ടെത്തിയതിനെക്കാൾ 480 അടി ആഴത്തിലാണ് പുതിയ നീല ഗർത്തം കണ്ടെത്തിയിരിക്കുന്നത്. 2023 ഡിസംബർ 6-ന് നടന്ന സ്‌കൂബ ഡൈവിംഗ് പര്യവേഷണത്തിനിടെയാണ് താം ജാ ബ്ലൂ ഹോൾ കണ്ടെത്തുന്നത് ഫ്രോണ്ടിയേഴ്‌സ് ഇൻ മറൈൻ സയൻസ് ജേണലിൽ തിങ്കളാഴ്ച പ്രസിദ്ധീകരിച്ച പഠനമനുസരിച്ച്, സൈറ്റിൽ നിലവിലുള്ള പാരിസ്ഥിതിക സാഹചര്യങ്ങൾ വിശകലനം ചെയ്യുന്നതിനാണ് പര്യവേഷണം നടത്തിയത്. ഇതിനുള്ളിൽ ഒളിഞ്ഞിരിക്കുന്ന ഗുഹകളും തുരങ്കങ്ങളും ഉണ്ടാകുമെന്ന് ശാസ്ത്രജ്ഞർ അനുമാനിക്കുന്നു.
ചുണ്ണാമ്പുകല്ല്, മാർബിൾ അല്ലെങ്കിൽ ജിപ്സം പോലെയുള്ള വസ്തുക്കളിൽ നിർമ്മിതമായിരിക്കുന്ന അടിത്തട്ടുള്ള തീരപ്രദേശങ്ങളിൽ കാണപ്പെടുന്ന വെള്ളം നിറഞ്ഞ ലംബമായ ഗുഹകളോ സിങ്ക്ഹോളുകളോ ആണ് നീല ഗർത്തങ്ങൾ. ഉപരിതലത്തിലെ ജലം പാറകൾക്കിടയിലൂടെ ഒഴുകുമ്പോൾ ഇത് വിവിധ ധാതുക്കളെ ലയിപ്പിക്കുകയും പാറകൾക്കിടയിലെ വിള്ളലുകൾ വികസിക്കുകയും ചെയ്യും. ഇങ്ങനെയാണ് നീല ഗർത്തങ്ങൾ രൂപം കൊള്ളുന്നത്. ബഹാമാസിലെ ഡീൻ ബ്ലൂ ഹോൾ, ഈജിപ്തിലെ ദഹാബ് ബ്ലൂ ഹോൾ, ബെലീസിലെ ഗ്രേറ്റ് ബ്ലൂ ഹോൾ എന്നിവ ലോകത്തിലെ പ്രശസ്തമായ നീല ഗർത്തങ്ങളാണ്.
