അവഗണനകൾക്കും ഒഴിവാക്കലുകൾക്കും പഴികേൾക്കലുകൾക്കും ശേഷമാണ് മലയാളികളുടെ സ്വന്തം സഞ്ജു ലോകകപ്പ് ടീമിൽ ഇടംപിടിച്ചിരിക്കുന്നത്. നീണ്ട 9 വർഷത്തെ കരിയറിൽ ഇത് ആദ്യമായാണ് ലോകകപ്പ് ടീമിലേക്ക് സഞ്ജു എത്തുന്നത്. ഇന്നലെ എക്സിലൂടെയാണ് ബിസിസിഐ ലോകകപ്പിനുള്ള 15 അംഗ ടീമിനെ പ്രഖ്യാപിച്ചത്. പിന്നാലെ സഞ്ജുവിന്റെ പ്രതികരണവും വന്നു.
‘വിയർപ്പു തുന്നിയിട്ട കുപ്പായം’ എന്ന അടിക്കുറിപ്പോടെ ഇന്ത്യൻ ടീമിന്റെ ജാക്കറ്റ് ധരിച്ച് നിൽക്കുന്ന ചിത്രമാണ് ഇൻസ്റ്റഗ്രാമിൽ സഞ്ജു പങ്കുവച്ചത്. മഞ്ഞുമ്മൽ ബോയ്സ് എന്ന സിനിമയിലെ ഒരു ഗാനത്തിന്റെ ആദ്യ വരിയാണിത്. തന്റെ കഴിവ് കൊണ്ട് നേടിയ അംഗീകാരത്തെ സൂചിപ്പിച്ച് സഞ്ജു കുറിച്ച വാക്കുകൾ ആരാധകരും ഏറ്റെടുത്ത് കഴിഞ്ഞു. ഐപിഎല്ലിൽ മികച്ച പ്രകടനം പുറത്തെടുക്കുന്ന സഞ്ജുവിനെ അവഗണിക്കാൻ സെലക്ടർമാർക്കുമായില്ല.
വിയർപ്പു തുന്നിയിട്ട കുപ്പായം…
അതിൽ നിറങ്ങൾമങ്ങുകയില്ല കട്ടായം
കിനാവു കൊണ്ടുകെട്ടും കൊട്ടാരം
അതിൽ മന്ത്രി നമ്മൾ തന്നെ രാജാവും
ചെറിയ ഭൂമിയില്ലേ വിധിച്ചത് നമക്ക്
ഉച്ചികിറുക്കിൽ നീ ഉയരത്തിൽ പറക്ക്
ചേറിൽ പൂത്താലും താമര കണക്ക്
ചോറ് പോരെ മണ്ണിൽ ജീവിക്കാൻ നമ്മക്ക്…
എന്നീ വരികളടങ്ങുന്ന പാട്ടാണ് പോസ്റ്റിൽ ബാക്ക്ഗ്രൗണ്ട് സ്കോറായി പങ്കുവച്ചിരിക്കുന്നത്. ഇത് സഞ്ജുവിന് വേണ്ടി എഴുതിയ വരികൾ പോലെയുണ്ട്, ഒറ്റക്കു വഴിവെട്ടി വന്നവനാടാ, ഹമാരാ ക്യാപ്റ്റൻ കേസാ ഹോ? സഞ്ജു സാംസൺ ജെസാ ഹോ, എന്നീ കമന്റുകളാണ് പോസ്റ്റിന് താഴെ ആരാധകർ പങ്കുവച്ചിരിക്കുന്നത്.
9 ഇന്നിംഗ്സിൽ നിന്ന് 77 ശരാശരിയിൽ 385 റൺസുമായി സ്ട്രൈക്ക് റേറ്റിൽ രണ്ടാമതും റൺ വേട്ടക്കാരുടെ പട്ടികയിൽ ആറാമതുമാണ് ഈ മല്ലുബോയ്. സീസണിൽ ഒമ്പത് മത്സരങ്ങളിൽ 8ലും ടീമിന് വിജയം സമ്മാനിച്ച നേതൃമികവിലും തിളങ്ങുകയാണ് സഞ്ജുവെന്ന നായകൻ.
