” എനിക്ക് ചില സ്ഥലങ്ങളിൽ പോകാൻ പേടിയാ, ഉയരം പേടിയാ, ആളുകളെ പേടിയാ” ഇങ്ങനെ വിവിധ ഭയങ്ങളെ കുറിച്ച് നാം കേട്ടിരിക്കും. ജനിച്ച സ്വന്തം വീട്ടിലും പരിചയമുള്ള സ്ഥലങ്ങളിലും ഒറ്റയ്ക്ക് നിൽക്കാൻ ഭയമുള്ള വ്യക്തികളെ നിങ്ങൾക്ക് പരിചയമുണ്ടായിരിക്കും. ഇത്തരത്തിലുള്ള ഭയങ്ങളെ ഓരോ ഫോബിയകളായി തരം തിരിച്ചിരിക്കുന്നു. ഇതിലൊന്നാണ് ക്ലസ്ട്രോഫോബിയ. എന്താണ് ക്ലസ്ട്രോഫോബിയ? അറിയാം..
അടഞ്ഞ ഇടങ്ങളിലോ ആൾക്കൂട്ടത്തിന് നടുവിലോ നിൽക്കാനുള്ള ഭയത്തെയാണ് ക്ലസ്ട്രോഫോബിയ എന്ന് പറയുന്നത്. ലിഫ്റ്റുകൾ, മുറികൾ, തുടങ്ങി ഇടുങ്ങിയ സ്ഥലങ്ങളിലൊക്കെ ഇരിക്കുമ്പോൾ അമിത ഉത്കണ്ഠയും ഭയവും തോന്നുന്നതാണ് ഇതിന് കാരണം. ഇത്തരത്തിലുള്ള ഭയം അമിതമായാൽ ഇത് ഹൃദയാഘാതത്തിലേക്ക് വരെ വഴിവച്ചേക്കാം.
പൊതുവെ സ്ത്രീകളിലും പുരുഷന്മാരിലും ഈ ഫോബിയ കണ്ടുവരുന്നു. കുട്ടിക്കാലം മുതലോ അല്ലെങ്കിൽ യൗവ്വനത്തിന്റെ തുടക്കം മുതലോ ഈ ഫോബിയ ആളുകളിൽ പ്രകടമാകുന്നു. ക്ലസ്ട്രോഫോബിയയുള്ള വ്യക്തികൾക്ക് പലപ്പോഴും തങ്ങളുടെ ഇഷ്ടടപ്പെട്ട സ്ഥലങ്ങളിൽ പോകണമെന്നും നിൽക്കണമെന്നും ആഗ്രഹമുണ്ടായിരിക്കാം. എന്നാൽ പലപ്പോഴും അമിതമായ ഉത്കണ്ഠയും ആശങ്കയും കാരണം ഇതിന് സാധിക്കാതെ വരുന്നു.
കൈ കാലുകൾ വിറയ്ക്കുക, ഹൃദയമിടിപ്പ് കൂടുക, അമിതമായ വിയർക്കൽ, ശ്വാസമെടുക്കാനുള്ള ബുദ്ധിമുട്ട്, തലകറക്കം തുടങ്ങിയവയാണ് ഇതിന്റെ മറ്റ് ലക്ഷണങ്ങൾ. സൈക്കോളജിസ്റ്റിന്റെ സഹായം തേടി തെറാപ്പികൾ സ്വീരിക്കുകയെന്നതാണ് ഈ ഫോബിയയ്ക്കുള്ള പരിഹാര മാർഗം.
