കുട്ടികൾക്കും മുതിർന്നവർക്കും ഒരുപോലെ ഇഷ്ടപ്പെടുന്ന വിഭവമാണ് ഐസ്ക്രീം. പ്രത്യേകിച്ചും വേനൽക്കാലം വന്നാൽ ഐസ്ക്രീമിനോടുള്ള താൽപ്പര്യം കൂടും . ഇപ്പോൾ ഐസ് ക്രീമിൽ വ്യത്യസ്ത രുചികളും ലഭ്യമാണ്. എന്നാൽ ഐസ്ക്രീമിന് ശേഷം കഴിക്കുന്ന ആഹാരങ്ങളും ശ്രദ്ധിക്കേണ്ടതുണ്ട് . ഇല്ലെങ്കിൽ ആസ്വദിച്ച് കഴിക്കുന്നത് വിപരീതഫലങ്ങളാകും ഉണ്ടാക്കുക .
ഐസ്ക്രീം കഴിച്ചതിന് ശേഷം ചൂടുള്ള പാനീയങ്ങൾ അല്ലെങ്കിൽ കഫീൻ അടങ്ങിയ പാനീയങ്ങൾ ഒഴിവാക്കണം . ചായ, കാപ്പി, സൂപ്പ് തുടങ്ങിയ ചൂടുള്ള പദാർത്ഥങ്ങൾ കഴിക്കരുത്. ഇത് ചുമ, വയറുവേദന, തൊണ്ടവേദന തുടങ്ങിയ പ്രശ്നങ്ങൾക്ക് കാരണമാകും. ഐസ് ക്രീം കഴിച്ചതിന് ശേഷം ഇവ കഴിക്കുന്നത് ശരീര താപനിലയിൽ പെട്ടെന്നുള്ള മാറ്റത്തിന് കാരണമാകുന്നു.
നാരങ്ങ, ഓറഞ്ച്, മുന്തിരി തുടങ്ങിയ പുളിയുള്ള പഴങ്ങൾ ഐസ്ക്രീമിന്റെ കൂടെയോ അതിന് ശേഷമോ കഴിക്കരുത്. ഇത് നിങ്ങൾക്ക് അസിഡിറ്റി അല്ലെങ്കിൽ ദഹനപ്രശ്നങ്ങൾ ഉണ്ടാക്കിയേക്കാം. സിട്രസ് പഴങ്ങൾ അസിഡിക് ആണ്. ഇത് ഐസ് ക്രീമിലെ പാലുമായി പ്രതിപ്രവർത്തിച്ച് വയറിന് അസ്വസ്ഥത ഉണ്ടാക്കുന്നു.
ഐസ്ക്രീം കഴിച്ചയുടനെ എരിവുള്ള ഭക്ഷണം കഴിക്കുന്നത് ദഹനക്കേട്, വയറിളക്കം എന്നിവയ്ക്ക് കാരണമാകും. എരിവുള്ള ഭക്ഷണത്തിൽ ക്യാപ്സൈസിൻ അടങ്ങിയിട്ടുണ്ട്. ഐസ്ക്രീമിലെ പാലുമായി ഇത് പ്രതിപ്രവർത്തിക്കുന്നു. ഐസ്ക്രീം കഴിച്ച ശേഷം മദ്യം കഴിക്കുന്നത് പ്രശ്നങ്ങൾ ഉണ്ടാക്കും. മദ്യം കഴിക്കുന്നത് ഐസ്ക്രീമിലെ പാലിന്റെ ദഹനത്തെ മന്ദഗതിയിലാക്കുന്നു. ഇത് ഛർദ്ദി, വയറിളക്കം എന്നിവയ്ക്കൊപ്പം വയറുവേദന പോലുള്ള പ്രശ്നങ്ങൾ ഉണ്ടാക്കുന്നു.
ഐസ് ക്രീം കഴിച്ചയുടൻ ബിരിയാണി, മട്ടൺ, വറുത്ത ഭക്ഷണങ്ങൾ എന്നിവ കഴിക്കുന്നത് നല്ലതല്ല. ഇങ്ങനെ കഴിക്കുന്നത് വയറിന് ദഹനക്കേടുണ്ടാക്കുന്നു. ഐസ്ക്രീമിനൊപ്പം എണ്ണമയമുള്ള ഭക്ഷണം കഴിക്കുന്നത് ദഹിക്കാൻ സമയമെടുക്കും. ഇത് വയറ്റിൽ വേദനയും ഉണ്ടാക്കാം.