സൗബിൻ ഷാഹിറും നമിതാ പ്രമോദും കേന്ദ്ര കഥാപാത്രങ്ങളായെത്തുന്ന പുതിയ ചിത്രം മച്ചാന്റെ മാലാഖയുടെ റിലീസ് തീയതി പ്രഖ്യാപിച്ചു. ചിരിപ്പൂരവുമായി ജൂൺ 14-നാണ് ചിത്രം തിയേറ്ററുകളിലെത്തുന്നത്. ധ്യാൻ ശ്രിനിവാസനാണ് ചിത്രത്തിന്റെ പോസ്റ്റർ പങ്കുവച്ചുകൊണ്ട് റിലീസ് തീയതി അറിയിച്ചിരിക്കുന്നത്. ഒരു മുഴുനീള ഫാമിലി എന്റർടൈനർ ചിത്രമായാണ് മച്ചാന്റെ മാലാഖയെത്തുക. ബോബൻ സാമുവലാണ് ചിത്രം സംവിധാനം ചെയ്യുന്നത്.
കെഎസ്ആർടിസി കണ്ടക്ടറായി സൗബിനും ഭാര്യയായി നമിതയും ചിത്രത്തിലെത്തുന്നു. ഇവരെ കൂടാതെ ധ്യാൻ ശ്രീനിവാസൻ, ദിലീഷ് പോത്തൻ, ശാന്തി കൃഷ്ണ, ലാൽ ജോസ്, ആര്യ, ശ്രുതി എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്. കുടുംബ ബന്ധങ്ങളുടെ സ്നേഹവും ആഴവും പ്രേക്ഷകരുടെ മുന്നിലെത്തിക്കുന്ന ചിത്രമാണ് മച്ചാന്റെ മാലാഖ എന്നാണ് പുറത്തുവരുന്ന വിവരം.
കൊച്ചു കൊച്ചു സന്തോഷങ്ങളിലൂടെയും നർമ്മ മുഹൂർത്തങ്ങളിലൂടെയുമാണ് ചിത്രം കടന്നുപോകുന്നത്. ഷോപ്പ് ജീവനക്കാരിയായാണ് നമിത ചിത്രത്തിലെത്തുന്നത്. ഇവരുടെ ജീവിതത്തിൽ നടക്കുന്ന സംഭവബഹുലമായ വിശേഷങ്ങളാണ് ചിത്രം പ്രേക്ഷകരുടെ മുന്നിലേക്കെത്തിക്കുന്നത്.