അമരാവതി: ചെക്ക് പോസ്റ്റിലൂടെ കടത്താൻ ശ്രമിച്ച എട്ട് കോടി രൂപ പിടികൂടി. ആന്ധ്രാപ്രദേശിലെ എൻടിആർ ജില്ലയിലെ ഗരികപ്പാട് ചെക്ക് പോസ്റ്റിലൂടെ ലോറിയിൽ കടത്താൻ ശ്രമിച്ച കണക്കിൽപ്പെടാത്ത പണമാണ് പിടികൂടിയത്. സംഭവത്തിൽ രണ്ട് പേരെ പൊലീസ് കസ്റ്റഡിയിലെടുത്തു. ഇന്ന് പുലർച്ചെയായിരുന്നു സംഭവം.
പൈപ്പ് കയറ്റി പോവുകയായിരുന്ന ലോറിയിൽ രഹസ്യ അറ നിർമ്മിച്ചാണ് പണം കടത്തിയത്. ഹൈദരാബാദിൽ നിന്ന് ഗുണ്ടൂരിലേക്ക് പണം കടത്താനായിരുന്നു ശ്രമിച്ചതെന്ന് ജഗ്ഗയ്യപേട്ട സർക്കിൾ ഇൻസ്പെക്ടർ ചന്ദ്രശേഖർ പറഞ്ഞു. പിടിച്ചെടുത്ത പണം ജില്ലാ സ്ക്രൂട്ടിനി ടീമിന് കൈമാറും. തുടർ നടപടികൾ ഫ്ളയിംഗ് സ്ക്വാഡ് ടീമും കൈക്കൊള്ളുമെന്നും അദേഹം അറിയിച്ചു.