ജന്മദിനത്തിൽ സായ് പല്ലവിയുടെ ബെർത്ത് ഡേ സ്‌പെഷ്യൽ വീഡിയോ പങ്കുവച്ച് തണ്ടേൽ ടീം. സായ് പല്ലവിയുടെ ശക്തമായ കഥാപാത്രങ്ങളെ ഹൈലറ്റ് ചെയ്താണ് വീഡിയോ ആരംഭിക്കുന്നത്. ശേഷം തണ്ടേലിലെ കഥാപാത്രമായുള്ള സായ് പല്ലവിയുടെ വേഷപ്പകർച്ചയും വീഡിയോയിൽ കാണാം.
ചിത്രീകരണത്തിനിടയുള്ള രസകരമായ നിമിഷങ്ങളും വീഡിയോയിൽ ഉൾക്കൊള്ളിച്ചിട്ടുണ്ട്. ആക്ഷൻ പറഞ്ഞതിന് ശേഷം ഇമോഷണൽ രംഗങ്ങൾ മനോഹരമായി കൈകാര്യം ചെയ്യുകയും കട്ട് പറഞ്ഞതിന് ശേഷം കഥാപാത്രത്തിൽ താരം പുറത്തുവരുന്നതും വീഡിയോയിൽ ഉൾപ്പെടുത്തിയിട്ടുണ്ട്. തണ്ടേലിൽ ബുജ്ജി എന്ന നായിക കഥാപാത്രത്തെയാണ് സായ് പല്ലവി അവതരിപ്പിക്കുന്നത്.
ലൗ സ്റ്റോറി എന്ന ചിത്രത്തിന് ശേഷം നാഗചൈതന്യയും സായ് പല്ലവിയും ഒരുമിക്കുന്ന ചിത്രമാണ് തണ്ടേൽ. ആന്ധ്രാപ്രദേശിലെ ശ്രീകാകുളത്ത് നിന്ന് മത്സ്യബന്ധത്തിന് പോകുകയും, പാകിസ്താനിൽ വച്ച് പിടിക്കപ്പെടുകയും ചെയ്ത ഒരു കൂട്ടം മത്സ്യത്തൊഴിലാളികളുടെ കഥയാണ് ചിത്രത്തിൽ പറയുന്നത്. ചന്തു മൊണ്ടതിയാണ് ചിത്രം സംവിധാനം ചെയ്യുന്നത്.
മാസങ്ങൾക്ക് മുമ്പ് പുറത്തുവന്ന ചിത്രത്തിന്റെ ടീസർ വളരെ ശ്രദ്ധ നേടിയിരുന്നു. ജിഎ 2 പിക്ചേഴ്സിന്റെ ബാനറിൽ അല്ലു അരവിന്ദാണ് ചിത്രം നിർമ്മിക്കുന്നത്. സംഗീത സംവിധാനം നിർവ്വഹിക്കുന്നത് ദേവിശ്രീ പ്രസാദാണ്. ചന്തു മൊണ്ടതി തന്നെയാണ് കഥയും തിരക്കഥയും ഒരുക്കുന്നത്.
