മുംബൈ: വിട പറഞ്ഞ പ്രശസ്ത സംവിധായകനും ഛായാഗ്രാഹകനുമായ സംഗീത് ശിവന്റെ സംസ്കാര ചടങ്ങുകൾ നടന്നു. വൈകിട്ട് അഞ്ച് മണിക്ക് മുംബൈയിലെ ഓഷിവാരായിലാണ് സംസ്കാര ചടങ്ങുകൾ നടന്നത്. പ്രിയ സംവിധായകനെ ഒരു നോക്ക് കാണാനായി ബോളിവുഡ് സിനിമാ മേഖലയിൽ നിന്നും നിരവധി താരങ്ങളാണെത്തിയത്.
ഋതേഷ് ദേശ്മുഖ്, ജാവേദ് ജഫ്രി, സംവിധായകൻ ടികെ രാജീവ് കുമാർ തുടങ്ങിയവർ അന്തിമോപചാരം അർപ്പിക്കാൻ എത്തിയിരുന്നു. മുംബൈയിലെ സ്വകാര്യ ആശുപത്രിയിൽ ഇന്നലെയായിരുന്നു അന്ത്യം. യോദ്ധ, ഗാന്ധർവം തുടങ്ങിയ നിരവധി ഹിറ്റ് ചിത്രങ്ങൾ സംവിധാനം ചെയ്തിട്ടുണ്ട്. 1990 ൽ ഇറങ്ങിയ വ്യൂഹം എന്ന ചിത്രമായിരുന്നു സംഗീത് ശിവൻ ആദ്യമായി സംവിധാനം ചെയ്തത്. രോമാഞ്ചം എന്ന സിനിമയുടെ ഹിന്ദി പതിപ്പായ കപ് കപി പുറത്തിറങ്ങാനിരിക്കെയാണ് വിയോഗം.
സൂപ്പർ ഹിറ്റ് സിനിമകൾ സമ്മാനിച്ച സംവിധായകനാണ് സംഗീത് ശിവൻ. വ്യൂഹം, യോദ്ധ, ഡാഡി, ഗാന്ധർവ്വം, ജോണി, സ്നേഹപൂർവ്വം അന്ന, നിർണയം, ഇഡിയറ്റ്സ്, ഈ എന്നിവയാണ് സംവിധാനം നിർവഹിച്ച മലയാളം സിനിമകൾ. സംഗീതിന്റെ വേർപാടിൽ ദുഃഖം രേഖപ്പെടുത്തി താരങ്ങളും രംഗത്തെത്തിയിരുന്നു.
