കൊച്ചി: പണിമുടക്ക് അവസാനിപ്പിച്ച് അമ്പലമുകൾ ബിപിസിഎൽ എൽപിജി ബോട്ലിംഗ് പ്ലാൻ്റിലെ ഡ്രൈവർമാർ. ഡ്രൈവർ ശ്രീകുമാറിനെ മർദ്ദിച്ച സിഐടിയു തൊഴിലാളികൾക്കെതിരെ നടപടിയെടുക്കുമെന്ന് അധികൃതർ അറിയിച്ചതോടെയാണ് പണിമുടക്ക് പി‌ൻവലിച്ചത്.
ഇന്നലെ മുതലാണ് പ്ലാന്റിൽ ഡ്രൈവർമാർ പണിമുടക്ക് ആരംഭിച്ചത്. ഇറക്കുകൂലിയിൽ 20 രൂപ കുറഞ്ഞുവെന്ന് ആരോപിച്ചാണ് ഡ്രൈവറെ തല്ലിച്ചതച്ചത്. ഇതിന് പിന്നാലെയാണ് തൊഴിൽ സംരക്ഷണം ആവശ്യപ്പെട്ട് ഡ്രൈവർമാർ മിന്നൽ പണിമുടക്ക് ആരംഭിച്ചത്.
ലോ‍‍ഡ് ഇറക്കുന്നതുമായി ബന്ധപ്പെട്ട വാക്കേറ്റമാണ് അക്രമത്തിൽ കലാശിച്ചത്. തനിക്ക് പണം നൽകിയിരിക്കുന്നത് ഏജൻസിയിൽ നിന്നാണെന്നും അതിനാൽ തന്നെ കൂടുതൽ തുക നൽകാൻ കഴിയില്ലെന്നും ഡ്രൈവർ അറിയിച്ചു. എന്നാൽ ഇത് കേൾക്കാൻ കൂട്ടാക്കാതെയാണ് സിഐടിയു തൊഴിലാളികൾ ഡ്രൈവറെ ക്രൂര മർദ്ദനത്തിന് ഇരയാക്കിയത്. മർദ്ദനത്തിന്റെ നടുക്കുന്ന ദൃശ്യങ്ങൾ പുറത്തുവന്നിരുന്നു.
