മലയാള സിനിമ വൻ വിജയങ്ങളിലേക്ക് കുതിക്കുമ്പോഴും സ്ത്രീ കഥാപാത്രങ്ങൾക്ക് പ്രാധാന്യമില്ലെന്ന തരത്തിലുള്ള ചർച്ചകൾ ഉയരുന്നുണ്ട്. വിഷയത്തിൽ നിരവധിപേർ തങ്ങളുടെ അഭിപ്രായങ്ങളും രേഖപ്പെടുത്തിയിട്ടുണ്ട്. ഇതുമായി ബന്ധപ്പെടുത്തി സംവിധായക അഞ്ജലി മോനോൻ സമൂഹമാദ്ധ്യമങ്ങളിൽ പങ്കുവച്ച പോസ്റ്ററാണ് ഇപ്പോൾ ചർച്ചയായിരിക്കുന്നത്.
തന്റെ ഇൻസ്റ്റഗ്രാം സ്റ്റോറിയിലാണ് താരം പോസ്റ്റ് പങ്കുവച്ചത്. മലയാള സിനിമയിലെ സ്ത്രീകൾ ഇപ്പോൾ എവിടെയാണ്? എന്ന് ചോദിച്ചുകൊണ്ട് മഞ്ഞുമ്മല് ബോയ്സ്, ആവേശം, 2018 എന്നീ സിനിമകളുടെ പോസ്റ്ററുകള് ഉള്പ്പെടുത്തിയ പോസ്റ്റാണ് അഞ്ജലി പങ്കുവച്ചത്. ഇതിനെ തുടർന്ന് അഞ്ജലി മോനോനെ വിമർശിച്ചും അനുകൂലിച്ചും നിരവധിപേർ രംഗത്തെത്തുന്നുണ്ട്.
സിനിമയിൽ സ്ത്രീകൾ ആവശ്യമാണെങ്കിൽ മാത്രം പോരെയെന്നാണ് ഒരു വിഭാഗം ചോദിക്കുന്നത്. വെറുതെ ഒരു സ്ത്രീ കഥാപാത്രത്തെ സൃഷ്ടിച്ച് സിനിമയിൽ അവതരിപ്പിക്കുന്നതിൽ അർത്ഥമില്ലെന്നും സോഷ്യൽമീഡിയ പറയുന്നുണ്ട്. ഇത്തരം അഭിപ്രായങ്ങളിലൂടെ അഞ്ജലിമോനോൻ സിനിമാ ലോകത്ത് സൃഷ്ടിച്ചെടുത്ത ബഹുമാനം അർത്ഥമില്ലെന്നും ചിലർ പറയുന്നു.
ഈ വിഷയത്തിൽ ഇത്രയും വിമർശനങ്ങൾ ഉയരാനുള്ള കാരണമെന്താണെന്ന ചോദ്യവും നിരവധിപേർ ഉന്നയിക്കുന്നുണ്ട്. അഞ്ജലി മോനോൻ അവരുടെ അഭിപ്രായം പറഞ്ഞതാണ്. ഒറ്റപ്പെടുത്താനാണ് തീരുമാനമെങ്കിൽ ചേർത്തു നിർത്താനാണ് ആഗ്രഹമെന്ന തരത്തിലെ പോസ്റ്റുകളും സമൂഹമാദ്ധ്യമങ്ങളിൽ നിറയുന്നുണ്ട്.
