മെക്സിക്കോ സിറ്റി: മെക്സിക്കോയിൽ പ്രസിഡൻ്റ് സ്ഥാനാർത്ഥിയുടെ തെരഞ്ഞെടുപ്പ് പ്രചാരണ റാലിക്കിടെയുണ്ടായ ശക്തമായ കാറ്റിൽ വേദി തകർന്ന് വീണ് ഒരു കുട്ടിയുൾപ്പെടെ ഒൻപത് പേർ മരിച്ചു. വടക്കൻ മെക്സിക്കൻ സംസ്ഥാനമായ ന്യൂവോ ലിയോണിൽ ബുധനാഴ്ച്ച വൈകിട്ടായിരുന്നു സംഭവം. അപകടത്തിൽ 50 ഓളം പേർക്ക് പരിക്കേറ്റതായും സംസ്ഥാന ഗവർണർ സാമുവൽ ഗാർസിയ തന്റെ ഔദ്യോഗിക എക്സിൽ അറിയിച്ചു
സിറ്റിസൺസ് മൂവ്മെൻ്റ് പാർട്ടിക്ക് വേണ്ടി മത്സരിക്കുന്ന പ്രസിഡൻ്റ് സ്ഥാനാർത്ഥി ജോർജ് അൽവാരസ് മെയ്നസിന്റെ റാലിക്കിടെയാണ് ദാരുണമായ സംഭവം ഉണ്ടായത്. പരിക്കേറ്റവർ പ്രാദേശിക ആശുപത്രികളിൽ ചികിത്സയിൽ കഴിയുകയാണെന്നും സാമുവൽ ഗാർസിയ പറഞ്ഞു. അപകടത്തിൽ പ്രസിഡൻ്റ് സ്ഥാനാർത്ഥി ജോർജ് അൽവാരസ് മെയ്നസിനും പരിക്കേറ്റിട്ടുണ്ട്. അപകടത്തെത്തുടർന്ന് മെയ്നസ് തന്റെ തെരഞ്ഞെടുപ്പ് പ്രചാരണം താൽക്കാലികമായി നിർത്തി വച്ചിരിക്കുകയാണ്.
അതേസമയം പ്രദേശത്ത് കാലാവസ്ഥ മോശമായതിനാൽ ആൾക്കാർ പുറത്തിറങ്ങരുതെന്നും വേണ്ട മുൻകരുതൽ സ്വീകരിക്കണമെന്നും ഗവർണർ ആവശ്യപ്പെട്ടു. ജൂൺ രണ്ടിനാണ് മെക്സിക്കോയിൽ പ്രസിഡന്റ് തെരഞ്ഞെടുപ്പ്.