ലക്നൗ: അമിതാഭ് ബച്ചനെ അനുകരിച്ച് ശ്രദ്ധേയനായ നടൻ ഫിറോസ് ഖാൻ അന്തരിച്ചു. ഉത്തർപ്രദേശിലെ ബാദൗണിൽ വച്ചാണ് അന്ത്യം. ഹൃദയാഘാതമാണ് മരണകാരണമെന്ന് അദ്ദേഹത്തിന്റെ സുഹൃത്തും നടനുമായ ദുർഗ റാഹിഗ്വാർ അറിയിച്ചു.
” ജൂനിയർ അമിതാഭ് ബച്ചൻ എന്നറിയപ്പെടുന്ന ഫിറോസ് ഖാൻ ഇനി ഞങ്ങളോടൊപ്പമില്ല. അദ്ദേഹം നമ്മെ വിട്ടിപിരിഞ്ഞിരിക്കുന്നു.”- ദുർഗ റാഹിഗ്വാർ ഇൻസ്റ്റഗ്രാമിൽ കുറിച്ചു. കപിൽ ശർമ്മയ്ക്കൊപ്പം ഒരു ഷോയിൽ അമിതാഭ് ബച്ചനെ അനുകരിക്കുന്ന ഫിറോസ്ഖാന്റെയും ഷാരൂഖിന്റെ വേഷമിട്ട് നിൽക്കുന്ന റാഹിഗ്വാറിന്റെയും ചിത്രവും അദ്ദേഹം പങ്കുവച്ചിരുന്നു.
View this post on Instagram
ടിവി ഷോകളിലൂടെ അമിതാഭ് ബച്ചനെ അനുകരിച്ചായിരുന്നു ഫിറോസ് ഖാൻ പ്രേക്ഷകശ്രദ്ധ നേടിയത്. ഭാബി ജി ഘർ പേ ഹേ എന്ന ടിവി ഷോയിലൂടെ പ്രശസ്തനായ അദ്ദേഹം ജിജാ ജി ഛത് പർ ഹേ, സാഹേബ് ബീബി ഔർ ബോസ്, ഹപ്പു കി ഉൽത്താൻ പൾട്ടൻ, ശക്തിമാൻ തുടങ്ങിയ ഷോകളിലും മിന്നുന്ന പ്രകടനം കാഴ്ചവച്ചിട്ടുണ്ട്.
മേയ് നാലിന് ബദൗൺ ക്ലബിൽ നടന്ന മഹോത്സവത്തിന്റെ ഷോയിലാണ് അവസാനമായി അമിതാഭ് ബച്ചനെ അനുകരിച്ചത്. ദീവാർ എന്ന സിനിമയാണ് അമിതാഭ് ബച്ചനെ അനുകരിക്കുന്നതിനായി ഫിറോസിനെ പ്രേരിപ്പിച്ചത്.
