പാെതു വേദിയിൽ തെറിവിളിയുമായി പിന്നണി ഗായകനും റാപ്പറുമായ ഡബ്സീ എന്നറിയപ്പെടുന്ന മുഹമ്മദ് ഫാസിൽ. ലൈവ് ഷോയ്ക്ക് മുൻപ് സൗണ്ട് ചെക്കിംഗിനിടെയാണ് ഇയാൾ സൗണ്ട് എഞ്ചിനീയറെ പരസ്യമായി തെറിവിളിച്ചത്. സൗണ്ട് എഞ്ചിനീയർ ഡബ്സീയുടെ ഇഷ്ടത്തിന് സൗണ്ട് ഡിസൈൻ ചെയ്തില്ലെന്ന് പറഞ്ഞായിരുന്നു ആക്രോശിച്ചത്.
ഇദ്ദേഹം മോശമായ പദങ്ങൾ ഉപയോഗിച്ച് സൗണ്ട് എഞ്ചിനീയറെ മൈക്കിലൂടെ ആക്ഷേപിക്കുന്ന വീഡിയോ സമൂഹമാദ്ധ്യമങ്ങളിൽ ഇതിനകം വൈറലായിട്ടുണ്ട്. തന്റെ ഇഷ്ടത്തിന് സൗണ്ട് തരണമെന്നും ഇല്ലെങ്കിൽ മൈക്ക് വലിച്ചെറിഞ്ഞിട്ട് വേറെ പണിക്കുപോകും എന്നൊക്കെ ഡബ്സീ വീഡിയോയിൽ പറയുന്നത്. ട്രാക്കിന്റെ സൗണ്ട് കുറക്കരുതെന്നും സൗണ്ട് എഞ്ചിനീയറിന്റെ സൗകര്യത്തിൽ ഒന്നും നടക്കില്ലെന്നും പറഞ്ഞായിരുന്നു ആക്രോശം. ഇതിന് പിന്നാലെ റാപ്പർ അസഭ്യം പറഞ്ഞ് വേദി വിടുകയായിരുന്നു.
വീഡിയോ സമൂഹമാദ്ധ്യമങ്ങളിൽ വൈറലായതിന് പിന്നാലെ ഡബ്സിയുടെ മോശം പെരുമാറ്റത്തെ വിമർശിച്ച് നിരവധിപേരാണ് രംഗത്തെത്തി. ആദ്യമായി ഡബ്സിയുമായി ചേർന്ന് ഷോ ചെയ്യുന്ന സൗണ്ട് എഞ്ചിനീയർക്ക് ഇയാളുടെ ശബ്ദം അറിയാൻ സാധിക്കില്ല. അതിന് ഇങ്ങനെ ആക്രോശിക്കേണ്ടതില്ല. ഒരു ഗായകന്റെ ശബ്ദം ആളുകൾ സ്വീകരിച്ചിട്ടുണ്ടെകിൽ അതിന്റ 50% ക്രെഡിറ്റ് സൗണ്ട് എഞ്ചിനീയർക്ക് തന്നെയാണ് അവരെ പരസ്യമായി അധിക്ഷേപിക്കരുത്. ഇതൊരു കലാകാരന് പറ്റിയതല്ല, മൈക്ക് അയാളുടെ അന്നം ആണെന്ന് മനസ്സിലാക്കാൻ പോലും കഴിവില്ലാത്തവനാണ് ഡബ്സീ. കലയെ അപമാനിക്കുകയാണ് ഇയാൾ, ‘ഒറ്റവാക്കിൽ പറഞ്ഞാൽ അഹങ്കാരി എന്നിങ്ങനെ നിരവധി കമന്റുകളാണ് സമൂഹമാദ്ധ്യമങ്ങളിൽ നിറയുന്നത്.
മലബാർ ശൈലിയിൽ റാപ്പുകൾ പാടി സമൂഹമാദ്ധ്യമങ്ങളിൽ വൈറലായ ഗായകനാണ് ഡാബ്സീ. തല്ലുമാല സിനിമയിൽ തീം സോംഗ് പാടിയാണ് ഡബ്സീ സിനിമയിൽ ചുവടുവെക്കുന്നത്. ശേഷം കിംഗ് ഓഫ് കൊത്ത, പുലിമട, സുലൈഖ മൻസിൽ, ആവേശം, മന്ദാകിനി തുടങ്ങിയ സിനിമകളിലും പ്രവർത്തിച്ചിട്ടുണ്ട്.
