നരനായിങ്ങനെ ജീവിച്ച് മടുത്തു ഇനി നായയായി കുറച്ചുകാലം ജീവിക്കാമെന്ന് പറഞ്ഞ് സോഷ്യൽ മീഡയയിൽ തരംഗം തീർത്ത വ്യക്തിയാണ് ജാപ്പനീസ് പൗരനായ ടോക്കോ. ഇതിനായി 12 ലക്ഷം രൂപ മുടക്കി യഥാർത്ഥത്തിൽ നായയെ പോലെ തോന്നിപ്പിക്കുന്ന വസ്ത്രങ്ങൾ വാങ്ങി ധരിച്ച് നായകളെ പോലെ നടക്കുകയും കഴിക്കുകയുമൊക്കെ ചെയ്ത ടോക്കോ അന്നും വാർത്തകളിൽ ഇടംപിടിച്ചിരുന്നു. ഇപ്പോൾ തന്റെ പുതിയ ആഗ്രഹം വെളിപ്പെടുത്തിയിരിക്കുകയാണ് ടോക്കോ.
നായയായി ജീവിച്ച് മടുത്തുവെന്നും ഇനി പാണ്ടയോ, ചെന്നായയോ, കുറുക്കനോ ആയി ജീവിക്കണമെന്നാണ് തന്റെ അടുത്ത ആഗ്രഹമെന്നും ടോക്കോ പറഞ്ഞു. പൂച്ചയായി ജീവിക്കാൻ ആഗ്രഹമുണ്ടെങ്കിലും തീരെ ചെറുതായതിനാൽ തന്റെ ആഗ്രഹം ഉപേക്ഷിച്ച് വലിയ മൃഗങ്ങളായ പാണ്ടയേയും ചെന്നായയെയുമൊക്കെ പട്ടികയിൽ ഉൾപ്പെടുത്തുകയായിരുന്നുവെന്നും ടോക്കോ പറയുന്നു.
‘ I Want to be an Animal’ എന്ന യൂട്യൂബ് ചാനലിലൂടെയാണ് നായയായി ജീവിക്കുന്നതിന്റെ രസകരമായ ജീവിതം ടോക്കോ ആരാധകരുമായി പങ്കുവയ്ക്കുന്നത്. നായയെ പോലെ ജീവിക്കുന്നത് ബുദ്ധിമുട്ടുള്ള കാര്യമാണെന്നും അത് പോലെ വസ്ത്രം വൃത്തിയാക്കുന്നതും പ്രയാസമാണെന്നും ടോക്കോ വീഡിയോയിലൂടെ പങ്കുവച്ചിട്ടുണ്ട്. അതിനാൽ ഇനി പാണ്ടയായി ജീവിക്കണമെന്നാണ് തന്റെ ആഗ്രഹമെന്നും ടോക്കോ പറയുന്നു. മില്യൺ വ്യൂവേഴ്സുള്ള ടോക്കോയുടെ വീഡിയോകളെ വിമർശിച്ചും പിന്തുണച്ചും നിരവധി പേർ രംഗത്തെത്താറുണ്ട്.