കോട്ടയം: അക്കാഡമിക് സഹകരണം ഉറപ്പുവരുത്തുന്നതിനായി കോട്ടയത്തെ ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ്സ് കമ്മ്യൂണിക്കേഷനും പാലായിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് ഇൻഫർമേഷൻ ടെക്നോളജിയും ധാരണാപത്രം ഒപ്പുവെച്ചു. ഐഐഎംസിക്കു വേണ്ടി ഡോ. അനുപമ ഭട്ട്നഗറും ഐഐഐടിക്ക് വേണ്ടി രജിസ്ട്രാർ ഡോ. എം രാധാകൃഷ്ണനുമാണ് ധാരണാപത്രങ്ങൾ ഒപ്പുവെച്ചത്. തുടർന്ന് ഡയറക്ടർ ജനറൽ ഐഐഐടിയുടെ ഡയറക്ടർ ഡോ. രാജീവ് വി. ധരസ്കറിന് കൈമാറി.
ഐഐഎംസി കോട്ടയം ക്യാമ്പസിലാണ് ചടങ്ങ് നടന്നത്. മാദ്ധ്യമപ്രവർത്തന രംഗത്ത് ഒഴിച്ചുകൂടാനാവാത്ത ഘടകങ്ങളായ നിർമിതബുദ്ധി, സൈബർ സെക്യൂരിറ്റി, സെർച്ച് എൻജിൻ ഒപ്റ്റിമൈസേഷൻ, വെബ്സൈറ്റ് നിർമ്മാണം, റോബോട്ടിക്സ്, തുടങ്ങിയ മേഖലകളിൽ ഐഐഐടി, ഐഐഎംസിക്ക് അക്കാദമിക് സഹായം നൽകുമെന്ന് ഐഐഐടി മേധാവി പറഞ്ഞു.
കമ്മ്യൂണിക്കേഷൻ, പബ്ലിക് റിലേഷൻസ്, ക്രൈസിസ് കമ്മ്യൂണിക്കേഷൻ തുടങ്ങിയ വിഷയങ്ങളിൽ ഐഐഎംസി നേടിയ മികവ് ഐഐഐടിക്കും പ്രയോജനപ്പെടും. കോട്ടയം ഇന്ത്യൻ ഇൻസ്റ്റിറ്റ്യൂട്ട് ഓഫ് മാസ് കമ്മ്യൂണിക്കേഷൻ റീജിയണൽ ഡയറക്ടർ പ്രൊഫ. ഡോ. അനിൽകുമാർ വടവാതൂർ അധ്യക്ഷത വഹിച്ചു. ഐഐഎംസി ഓഎസ്ഡി രശ്മി റോജ തുഷാര നായർ, ഡോ. റൂബൽ മറിയം ലിൻസി, ഡോ. മീര യു. മേനോൻ, രവിശങ്കർ എന്നിവർ സംസാരിച്ചു.
പുസ്തകവായന പ്രോത്സാഹിപ്പിക്കുന്നതിനായുള്ള നവീന സംരംഭം ”ഐഐഎംസി റീഡ്സ്” ഡോ. അനുപമ ഭട്ട്നഗർ ഉദ്ഘാടനം ചെയ്തു.