കുഞ്ചാക്കോ ബോബൻ പ്രധാന കഥാപാത്രമായെത്തുന്ന ചിത്രം ഗർർർ-ന്റെ റിലീസ് തീയതി പ്രഖ്യാപിച്ചു. ജൂൺ നാലിനാണ് ചിത്രം തിയേറ്ററുകളിലെത്തുന്നത്. ചിത്രത്തിലെ ആദ്യ ഗാനവും പുറത്തിറങ്ങിയിട്ടുണ്ട്. ‘ദുരിതമീ പ്രണയം’ എന്ന് തുടങ്ങുന്ന വീഡിയോ ഗാനമാണ് എത്തിയത്.
ഡോൺ വിൻസെന്റാണ് സംഗീതസംവിധാനം നിർവ്വഹിച്ചിരിക്കുന്നത്. ജെയ് കെയും പ്രവീണും ചേർന്ന് തിരക്കഥ ഒരുക്കിയ ചിത്രം ജെയ് കെയാണ് സംവിധാനം ചെയ്തത്. സുരാജ് വെഞ്ഞാറമുട്, സെന്തിൾ, മഞ്ജു പിള്ള എന്നിവരും ചിത്രത്തിൽ പ്രധാന വേഷത്തിലെത്തുന്നുണ്ട്. ഷാജി നടേശനും നടന് ആര്യയുമാണ് ചിത്രം നിര്മിച്ചത്.
സിംഹക്കൂട്ടിൽ അകപ്പെടുന്ന മദ്യപാനിയായ യുവാവിനെ രക്ഷപ്പെടുത്തുന്നതിനുള്ള അധികാരികളുടെ തത്രപ്പാടാണ് വീഡിയോ ഗാനത്തിലുള്ളത്. വളരെ വ്യത്യസ്ത കഥാപാത്രമായാണ് കുഞ്ചാക്കോ ബോബൻ ചിത്രത്തിലെത്തുന്നത്.
യൂട്യൂബ് നോക്കി സിംഹക്കൂട്ടിൽ കയറിപ്പറ്റാൻ ശ്രമിക്കുന്ന ഫയർ ഫോഴ്സ് സംഘത്തിന്റെ വളരെ രസകരമായ രംഗങ്ങളും ഗാനത്തിലുണ്ട്. തിരുവനന്തപുരം നഗരവും മൃഗശാലയുമാണ് ഗാനത്തിന്റെ പശ്ചാത്തലം. ചിരിവിരുന്നായിരിക്കും ഗർർർ പ്രേക്ഷകർക്ക് സമ്മാനിക്കുകയെന്ന് ആദ്യ ഗാനത്തിലൂടെ തന്നെ വ്യക്തമാണ്.
