ഡിജിറ്റൽ ബാങ്കിംഗ് മേഖലയിൽ പുത്തൻ ചുവടുവെപ്പുമായി രാജ്യത്തെ പ്രമുഖ എൻബിഎഫ്സി സ്ഥാപനമായ ജിയോ ഫിനാൻഷ്യൽ സർവീസസ്. മികച്ച അനുഭവം നൽകുന്നതിനായി ‘ജിയോ ഫിനാൻസ് ആപ്പ്’ പരീക്ഷണാടിസ്ഥാനത്തിൽ അവതരിപ്പിച്ചു. ആപ്പിന്റെ ബീറ്റ വേർഷനിലാണ് ആപ്പ് ലഭിക്കുക.
മികച്ച സേവനം ഉറപ്പുവരുത്തുന്നതിനായി എന്തൊക്കെ പരിഷ്കരണങ്ങളാണ് ഇനിയും നടത്തേണ്ടതെന്ന് ഉപയോക്താക്കളുടെ അഭിപ്രായം അറിയുന്നതിനാണ് ബീറ്റാ വേർഷൻ പുറത്തിറക്കിയതെന്ന് കമ്പനി അറിയിച്ചു. യുപിഐ ഇടപാടുകൾ, ബിൽ പേയ്മെന്റുകൾ തുടങ്ങി നിരവധി ഡിജിറ്റൽ ബാങ്കിംഗ് സേവനങ്ങളുടെ സംയോജനമാണ് ജിയോ ഫിനാൻസ് ആപ്പ് വാഗ്ദാനം ചെയ്തിരിക്കുന്നത്.
ഇൻസ്റ്റന്റ് ഡിജിറ്റൽ അക്കൗണ്ട് ഓപ്പണിംഗ് ബാങ്കിംഗ് സേവനമാണ് പ്രധാനമായി ആപ്പ് നൽകുന്നത്. ഞൊടിയിടയിൽ ഡിജിറ്റൽ അക്കൗണ്ട് തുറക്കാനും അതിവേഗം ബാങ്കിംഗ് സേവനങ്ങൾ നടത്താനും കഴിയും. ജിയോ ഫിനാൻസ് മൊബൈൽ ആപ്പുമായി ബന്ധിപ്പിച്ചിട്ടുള്ള ജിയോ പേയ്മെൻറ് ബാങ്ക് അക്കൗണ്ട് മുഖേന വിവിധ ബാങ്കിംഗ് സേവനങ്ങളെ ക്രോഡീകരിക്കുന്നു. ഉപയോക്താക്കൾക്ക് അവരുടെ അക്കൗണ്ട് വിവരങ്ങളും സമ്പാദ്യങ്ങളുടെയും കൺസോളിഡേറ്റഡ് വ്യൂ ആപ്പിൽ ആക്സസ് ചെയ്യാനാകും.
വേഗത്തിൽ ബിൽ പേയ്മെന്റുകളും യുപിഐ അധിഷ്ഠിത പണമിടപാടുകളും ജിയോ ഫിനാൻസ് ആപ്പിലൂടെ സാധിക്കും. വൈകാതെ തന്നെ ആപ്പിൽ വായ്പ സേവനങ്ങളും ലഭ്യമാകുമെന്നാണ് വിവരം. ജിയോ ഫിനാൻസ് ആപ്പിലൂടെ മ്യൂച്വൽ ഫണ്ടുകൾ ഈട് നൽകിയുള്ള വായ്പകൾ ലഭിക്കും. പിന്നാലെ ഭവന നിർമ്മാണത്തിനും വായ്പ സേവനം ലഭ്യമാക്കാനാണ് ജിയോ ഫിനാൻഷ്യൽ സർവീസസിന്റെ പദ്ധതി.
റിലയൻസ് ഇൻഡസ്ട്രീസ് ഗ്രൂപ്പിന്റെ കീഴിലുള്ള ധനകാര്യ സേവന മേഖലയിൽ പ്രവർത്തിക്കുന്ന വിവിധ സ്ഥാപനങ്ങളുടെ ഹോൾഡിംഗ് കമ്പനിയാണ് ജിയോ ഫിനാൻഷ്യൽ സർവീസസ്.
