ടി20 ലോകകപ്പിന്റെ ആവേശത്തിലാണ് ക്രിക്കറ്റ് ലോകം. അമേരിക്കയിലും വെസ്റ്റിൻഡീസിലുമായി ടൂർണമെന്റ് നടക്കുന്നതിനാൽ ടീമുകൾക്ക് കാലാവസ്ഥ വെല്ലുവിളിയായേക്കും. എന്നാൽ എല്ലാ വെല്ലുവിളികളെയും മറികടന്ന് കപ്പുയർത്താൻ കാത്തിരിക്കുന്ന ഒരുപിടി മുതിർന്ന താരങ്ങൾ എല്ലാ ടീമിലുമുണ്ട്. ഒരുപക്ഷേ ഇവരുടെയല്ലാം അവസാന ലോകകപ്പുമാകാം 2024ലേത്. ഇനിയൊരു ലോകകപ്പ് കളിക്കാൻ ഇവരിൽ പലരും ഉണ്ടായേക്കില്ല. ഇത്തരത്തിൽ അവസാന ലോകകപ്പ് കളിക്കാനിറങ്ങുന്ന താരങ്ങൾ ആരൊക്കെയാണെന്ന് പരിശോധിക്കാം.
ഡേവിഡ് വാർണർ
ഒന്നാമത്തെ താരം ഡേവിഡ് വാർണറാണ്. ഓസ്ട്രേലിയയുടെ ഇടം കൈയൻ ഓപ്പണറായ വാർണർ ടെസ്റ്റിൽ നിന്നും ഏകദിനത്തിൽ നിന്നും വിരമിക്കൽ പ്രഖ്യാപിച്ച് കഴിഞ്ഞു.ശേഷിക്കുന്നത് ടി20 ഫോർമാറ്റ് മാത്രമാണ്. ഒരുപക്ഷേ ലോകകപ്പോടെ വാർണർ ക്രിക്കറ്റ് കരിയറിന് ഫുൾ സ്റ്റോപ്പിട്ടേക്കാം. അത് കിരീടത്തോടെയാകാമെന്ന പ്രതീക്ഷയിലാകും വാർണർ
രോഹിത് ശർമ്മ
ഇന്ത്യൻ നായകൻ രോഹിത് ശർമ്മയാണ് അടുത്തയാൾ. ലോകകപ്പിൽ ടീം ഇന്ത്യയെ നയിക്കുന്നത് രോഹിത്താണ്. ഫോമിനെ കുറിച്ച് വിമർശനമുന്നയിക്കുന്നവർക്ക് തന്റെ ബാറ്റിംഗിലൂടെയാണ് അദ്ദേഹം മറുപടി നൽകുന്നത്. അഫ്ഗാനിസ്ഥാനെതിരെ കളിച്ച അവസാന ടി20യിൽ അദ്ദേഹം സെഞ്ച്വറി നേടിയിരുന്നു. ഇനിയൊരു ലോകകപ്പ് കളിക്കാൻ രോഹിത്തിന്റെ ഫിറ്റ്നസും ഫോമും അനുവദിച്ചേക്കില്ല. ഹിറ്റ്മാനും ഇനിയൊരു ലോകകപ്പ് കളിക്കാൻ ടീമിലുണ്ടായേക്കില്ല. ഇതുവരെയുള്ള എല്ലാ ലോകകപ്പും കളിച്ച താരമെന്ന നേട്ടവും രോഹിത്തിന് സ്വന്തമാണ്.
വിരാട് കോലി
2026-ൽ അടുത്ത ലോകകപ്പ് നടക്കുമ്പോൾ വിരാട് കോലിക്ക് പ്രായം 38.സ്ട്രൈക് റേറ്റിന്റെ പേരിൽ മുറവിളിക്കൂട്ടുന്നവർക്ക് ബാറ്റുകാെണ്ടാണ് അദ്ദേഹം മറുപടി നൽകുന്നത്. എതിരാളികൾക്ക് ഇന്നും പേടി സ്വപ്നമാണ് കോലി. ഏകദിന ലോകപ്പിലും ഐപിഎല്ലിലും ടൂർണമെൻ്റിലെ താരമായ കോലി വിരമിക്കൽ സൂചനയായി നേരത്തെ തന്നെ മത്സരങ്ങളിൽ നിന്ന് വിട്ട് നിന്നിരുന്നു.
ഗ്ലെൻ മാക്സ്വൽ
മോശം ഫോമും ഫിറ്റ്നസ് പ്രശ്നങ്ങളും ഏറെ നാളെയായി ഗ്ലെൻ മാക്സ്വെല്ലിനെ അലട്ടുന്നുണ്ട്. ഫോം തുടരാനായില്ലെങ്കിൽ 2026-ലെ ലോകകപ്പിന് അദ്ദേഹം ഉണ്ടാകാനിടയില്ല.
ടിം സൗത്തീ
നിലവിൽ 35 വയസുള്ള താരം ന്യൂസിലൻഡിന് വേണ്ടി അത്ര മികച്ച പ്രകടനമല്ല കാഴ്ചവയ്ക്കുന്നത്. ഫിറ്റ്സിലെ പ്രശ്നങ്ങളും പരിക്കും അലട്ടുന്ന താരം ഉടൻ തന്നെ വിരമിക്കൽ പ്രഖ്യാപിച്ചേക്കും.
മാത്യൂ വെഡ്
ആഭ്യന്തര ക്രിക്കറ്റിൽ നിന്ന് മാത്യൂ വെഡ് വിരമിച്ചിരുന്നു. നിലവിൽ ഏകദിനത്തിലും ടി20യിലും മാത്രം ശ്രദ്ധ കേന്ദ്രീകരിക്കുന്ന അദ്ദേഹം 2026-ലെ ലോകകപ്പിന് ഓസീസിനായി കളത്തിലിറങ്ങാൻ സാധ്യതയില്ല.
മൊയീൻ അലി
2021ലാണ് മൊയിൻ അലി ടെസ്റ്റിൽ നിന്ന് വിരമിക്കൽ പ്രഖ്യാപിച്ചത്. പിന്നീട് ഏകദിനങ്ങളിലും ടി20യിലും ഇംഗ്ലണ്ടിനായി കളിച്ചിരുന്ന അലി ഐപിഎല്ലിൽ ചെന്നൈയുടെ താരമാണ്. 36 വയസ് കഴിഞ്ഞ താരം 2026-ലെ ലോകകപ്പിൽ വിരമിക്കുമെന്നാണ് കരുതുന്നത്.
മുഹമ്മദ് നബി
അഫ്ഗാനിസ്ഥാൻ താരമായ മുഹമ്മദ് നബിക്ക് ഇപ്പോൾ പ്രായം 39. അടുത്ത ലോകകപ്പിന് താരം ഉണ്ടാകില്ലെന്ന് ഏതാണ്ട് ഉറപ്പാണ്. എന്നാൽ ഫ്രാഞ്ചൈസി ക്രിക്കറ്റിൽ ഇപ്പോഴും സജീവമാണ്.
