കണ്ണൂർ: ബിജെപി പ്രവർത്തകന്റെ വീടിന് നേരെ ബോംബെറിഞ്ഞ സംഭവത്തിൽ ഒരു സിപിഎം പ്രവർത്തകൻ കൂടി അറസ്റ്റിൽ. ന്യൂമാഹി പുതിയപറമ്പത്ത് സ്വദേശി ഷബിലാണ് അറസ്റ്റിലായത്. മുഖ്യപ്രതിയെ സ്ഥലത്തെത്തിച്ചത് ഷബിലാണെന്ന് കണ്ടെത്തിയതിനെ തുടർന്നാണ് ഇയാളെ അറസ്റ്റ് ചെയ്തത്.
ബോംബെറിഞ്ഞ മുഖ്യപ്രതി അരുണിനെ കഴിഞ്ഞ ദിവസം പൊലീസ് പിടികൂടിയിരുന്നു. ഈ മാസം എട്ടിനാണ് ബിജെപി പ്രവർത്തകന്റെ വീടിന് നേരെ ബോംബെറുണ്ടായത്. ബിജെപി പ്രവർത്തകനായ സനൂപിന്റെ വീടിന് നേരെയാണ് തെരഞ്ഞെടുപ്പ് ഫലം വന്നതിന് ശേഷം ആക്രമണം നടന്നത്. ഇത്തരം സംഭവങ്ങൾ തുടർച്ചയായി ഉണ്ടാകുന്ന സാഹചര്യത്തിൽ പ്രദേശത്ത് പൊലീസ് സുരക്ഷ ഏർപ്പെടുത്തിയിട്ടുണ്ട്.
പ്രതി ബോംബ് എറിയുന്നതിന്റെ സിസിടിവി ദൃശ്യങ്ങൾ പുറത്തുവന്നിരുന്നു. സ്റ്റീൽ ബോംബാണ് എറിഞ്ഞതെന്ന് കണ്ടെത്തിയിട്ടുണ്ട്. കൂത്തുപറമ്പ് നരവൂരിലും ബിജെപി പ്രവർത്തകന്റെ വീടിന് നേരെ ബോംബേറ് ഉണ്ടായിരുന്നു. വീടിന്റെ മതിലിൽ തട്ടി ബോംബ് പൊട്ടിയതിനാൽ അപകടം ഒഴിവാകുകയായിരുന്നു. ഈ സംഭവത്തിന്റെ അന്വേഷണം നടക്കുന്നതിനിടെയാണ് വീണ്ടും സമാന ആക്രമണം ആവർത്തിച്ചത്.