ഭംഗിയുള്ള ചില്ലുപാത്രങ്ങൾ കാണാൻ പ്രത്യേക രസമാണ്. വീട്ടിൽ അതിഥികൾ വരുമ്പോഴായിരിക്കും ഇത്തരത്തിലുള്ള ചില്ല് പാത്രങ്ങൾ വീട്ടിലുണ്ടെന്ന് പലപ്പോഴും നാം അറിയുന്നത്. എന്നാൽ കറികളും മറ്റും ഇതിൽ ഒഴിച്ച ശേഷം എത്ര കഴുകിയാലും എണ്ണക്കറയും മഞ്ഞളിന്റെ കറകളും പോകാറില്ല. പിന്നീട് ഈ പാത്രങ്ങൾ അതിഥികൾക്ക് മുന്നിൽ വയ്ക്കാൻ പറ്റാത്ത അസ്ഥയുമായിരിക്കും. എന്നാൽ ഇനി ഇത്തരം പ്രശ്നങ്ങൾ എളുപ്പത്തിൽ പരിഹരിക്കാം. അതിനായി ഈ മാർഗങ്ങൾ പരീക്ഷിച്ചോളൂ..
ടൂത്ത് പേസ്റ്റ്
പാത്രങ്ങളിൽ അടിഞ്ഞുകൂടിയ എണ്ണക്കറകളും മറ്റും നീക്കം ചെയ്യാൻ ഉത്തമമാണ് ടൂത്ത്പേസ്റ്റ്. പാത്രങ്ങളിൽ അൽപം ടൂത്ത്പേസ്റ്റെടുത്ത ശേഷം ഒരു ബ്രഷ് ഉപയോഗിച്ച് നന്നായി ഉരയ്ക്കുക. ശേഷം ചൂടുവെള്ളത്തിൽ കഴുകിയെടുക്കാവുന്നതാണ്.
വിനാഗിരിയും ബേക്കിംഗ് സോഡയും
അൽപം ബേക്കിംഗ് സോഡ എടുത്ത് ഇതിലേക്ക് ഒരു ടീസ്പൂൺ വിനാഗിരി ഒഴിച്ച് നന്നായി കലർത്തി പേസ്റ്റ് രൂപത്തിലാക്കുക. ഇത് പാത്രങ്ങളിൽ തേച്ച് പിടിക്കുക. ശേഷം ചെറു ചൂടുവെള്ളത്തിൽ കഴുകി കളയാവുന്നതാണ്.
നാരങ്ങാ നീരും ഉപ്പും
നാരങ്ങാ നീരിലേക്ക് അൽപം ഉപ്പ് ചേർത്ത് ഒരു ബ്രഷ് ഉപയോഗിച്ച് നന്നായി ഉരയ്ക്കുക. ഒരു പത്ത് മിനിറ്റോളം ഇങ്ങനെ ചെയ്യണം. ശേഷം പാത്രങ്ങൾ ചൂട് വെള്ളത്തിൽ മുക്കി വയ്ക്കുക. അൽപ സമയത്തിന് ശേഷം കഴുകാവുന്നതാണ്.
