ഇസ്ലാമാബാദ് : പാകിസ്താനിൽ, ദൈവനിന്ദ ആരോപിച്ച് 55 വയസ്സുകാരനെ കൗമാരക്കാരൻ കുത്തിക്കൊലപ്പെടുത്തി. നസീർ ഹുസൈൻ ഷായാണ് കൊല്ലപ്പെട്ടത് . കഴിഞ്ഞ ഒരാഴ്ചയ്ക്കിടെ നടക്കുന്ന രണ്ടാമത്തെ സംഭവമാണിത് ഇസ്ലാമിക . പ്രവാചകൻ മുഹമ്മദ് നബിക്കെതിരെ സംസാരിച്ചെന്ന് ആരോപിച്ചാണ് കൗമാരക്കാരൻ യുവാവിനെ കൊലപ്പെടുത്തിയത്.
പാകിസ്താനിലെ പഞ്ചാബ് പ്രവിശ്യയിലാണ് സംഭവം .നസീർ ഹുസൈൻ ഷാ, പാകിസ്താനിലെ ന്യൂനപക്ഷമായ ഷിയ വിഭാഗത്തിൽ പെട്ടയാളാണ്. ഷിയാ, അഹമ്മദിയ വിഭാഗങ്ങൾ അവിടെ തുടർച്ചയായി പീഡിപ്പിക്കപ്പെടുന്നുണ്ട് . നസീർ ഹുസൈൻ ഷാക്കെതിരെ അച്ഛനും അമ്മാവനും തുടർച്ചയായി സംസാരിക്കുന്നത് കുട്ടി കേട്ടിരുന്നതായി പൊലീസ് പറയുന്നു. ഇതോടെയാണ് കുട്ടിയുടെ മനസിൽ നസീറിനെതിരെ പക വളർന്നത്.
ഞായറാഴ്ച ഉച്ചയോടെ വീട്ടിൽ നിന്ന് കത്തിയുമായി നസീർ ഹുസൈൻ ഷായുടെ താമസസ്ഥലത്തെത്തിയ കുട്ടി പലതവണ ഇയാളെ കുത്തുകയായിരുന്നു. നസീർ സംഭവസ്ഥലത്ത് വെച്ച് തന്നെ മരിക്കുകയും ചെയ്തു. പിന്നാലെ കുട്ടി അവിടെ നിന്ന് ഓടി രക്ഷപ്പെട്ടു. കുട്ടിയെ പിടികൂടാൻ പ്രത്യേക സംഘം രൂപീകരിച്ചതായി പൊലീസ് അറിയിച്ചു. പിതാവിനും അമ്മാവനുമെതിരെ എഫ്ഐആർ രജിസ്റ്റർ ചെയ്തിട്ടുണ്ട്.
