ലോകത്തിലെ ഏറ്റവും മികച്ച മാമ്പഴ വിഭവങ്ങളുടെ പട്ടികയിൽ ഇടംപിടിച്ചിരിക്കുകയാണ് ഇന്ത്യക്കാരുടെ സ്വന്തം മാമ്പഴ ചട്നി. ലിസ്റ്റിൽ അഞ്ചാം സ്ഥാനമാണ് ചട്നി സ്വന്തമാക്കിയത്. ടേസ്റ്റ് അറ്റ്ലസ് നടത്തിയ തെരഞ്ഞെടുപ്പിലാണ് മാമ്പഴ ചട്നിക്ക് അഞ്ചാം സ്ഥാനം ലഭിച്ചത്. പട്ടികയിൽ ഒന്നാം സ്ഥാനം സ്വന്തമാക്കിയതും ഒരു ഇന്ത്യൻ വിഭവം തന്നെയാണ്.
ഗുജറാത്തുകാർക്കും മുംബൈകാർക്കും ഏറെ പ്രിയമുള്ള മാമ്പഴ വിഭവമായ ‘ആരംസ്’ ആണ് പട്ടികയിൽ ഒന്നാം സ്ഥാനത്തുള്ളത്. മുംബൈയിൽ വിവാഹ സദ്യയ്ക്കൊപ്പവും പൂരിക്കൊപ്പവും ഇത് വിളമ്പാറുണ്ട്. മാമ്പഴച്ചാറ് എന്ന് അർത്ഥം വരുന്ന വളരെ സ്വാദേറിയ ഭക്ഷണമാണ് ആരംസ്.
നന്നായി പഴുത്ത അൽഫോൺസ മാമ്പഴമാണ് ആരംസ് ഉണ്ടാക്കുന്നതിനായി ഉപയോഗിക്കുന്നത്. ഇതിന്റെ പൾപ്പെടുത്ത് പഞ്ചസാരയോ ശർക്കരയോ ചേർത്ത് നന്നായി അരച്ചെടുക്കുന്നു. ഇതിലേക്ക് അൽപം കശുവണ്ടി പൊടിച്ചതും, കുങ്കുമപ്പൂവും, ഏലയ്ക്കാ പൊടിയും ചേർക്കാം. ഇത് അൽപ നേരം തണുപ്പിച്ചതിന് ശേഷം കഴിക്കാം.
മംഗോളിയയിൽ നിന്നുള്ള മാംഗോ സ്റ്റിക്കി റൈസും ഫിലിപ്പൈൻസിൽ നിന്നുള്ള സോർബെസ്റ്റ്സുമാണ് രണ്ടും മൂന്നും സ്ഥാനം കരസ്ഥമാക്കിയത്. അരി ആവിയിൽ വേവിച്ചെടുത്ത ശേഷം മാമ്പഴം ചേർത്തുണ്ടാക്കുന്ന ചോറാണ് സ്റ്റിക്കി റൈസ്.
