പാൽഗർ: അക്ഷയശക്തി വെൽഫയർ അസോസിയേഷന്റെ മിഷൻ അക്ഷയവിദ്യ പദ്ധതിയുടെ ഭാഗമായി ഒരു ലക്ഷം നോട്ട്ബുക്കുകൾ വിതരണം ചെയ്തു. പാൽഗർ ജില്ലയിലെ 300 സ്കൂളുകളിലായി ഒറ്റ ദിവസം കൊണ്ടാണ് ഇത്രയും നോട്ട്ബുക്കുകൾ വിതരണം ചെയ്തത്.
30 സംഘങ്ങളായി തിരിഞ്ഞ് ഓരോ സംഘവും പത്ത് സ്കൂളുകളിൽ വീതം നോട്ട്ബുക്കുകൾ എത്തിക്കുകയായിരുന്നു. കാലാവസ്ഥാ വ്യതിയാനത്തെക്കുറിച്ച് കുട്ടികളെ ബോധവൽക്കരിക്കുന്നതിനായി പ്രത്യേകം തയ്യാറാക്കിയ കവർപേജുകൾ ഉൾപ്പെടുത്തിയ നോട്ട്ബുക്കുകളാണ് ഇക്കുറി വിതരണം ചെയ്തത്.
2010 മുതൽ ഓരോ വർഷവും പാൽഗർ മേഖലയിൽ അക്ഷയശക്തി മിഷൻ ഒരു ലക്ഷം നോട്ട്ബുക്കുകൾ സമാനമായ രീതിയിൽ വിതരണം ചെയ്യുന്നുണ്ടെന്ന് ഭാരവാഹികൾ അറിയിച്ചു. ഇത്തവണ ദിദ്വാനിയ രത്തൻലാൽ ചാരിറ്റബിൾ ട്രസ്റ്റും ടോം ഷിപ്പിംഗ് ഇൻഡ്യ പ്രൈവറ്റ് ലിമിറ്റഡും നിരവധി വ്യക്തികളുമാണ് ഈ ഉദ്യമത്തിൽ സംഭാവന നൽകിയതെന്നും ഭാരവാഹികൾ പറഞ്ഞു.
ആർട്ടിസ്റ്റും സാമൂഹ്യ പ്രവർത്തകയുമായ മിനി സുബോധ് ആണ് അക്ഷയശക്തിയുടെ സ്ഥാപക. വിദ്യാഭ്യാസം പ്രോത്സാഹിപ്പിക്കുകയും സമൂഹത്തിൽ അർഹരായവരെ സഹായിക്കുകയുമാണ് നോട്ട്ബുക്ക് വിതരണത്തിലൂടെ ലക്ഷ്യമിടുന്നത്. തുടക്കത്തിൽ ആർട്ട് വർക്കുകളും പെയിന്റിങ്ങുകളും വിൽപന നടത്തിയും സുഹൃത്തുക്കളുടെ കൈയ്യിൽ നിന്ന് സമാഹരിച്ചും അച്ചാർ വിൽപനയിലൂടെ ഉൾപ്പെടെ ലഭിക്കുന്ന തുക ചേർത്തുവെച്ചുമാണ് നോട്ട്ബുക്ക് വാങ്ങാനുളള ഫണ്ട് കണ്ടെത്തിയിരുന്നത്.
ഇതുവരെ ഒരു മില്യനിലധികം നോട്ട്ബുക്കുകൾ വിതരണം ചെയ്തുകഴിഞ്ഞതായി ഭാരവാഹികൾ വ്യക്തമാക്കി.
