തിരുവനന്തപുരം ; മീൻ പിടിക്കുന്നതിനിടയില് കടല്ച്ചൊറി കണ്ണില് തെറിച്ച് ചികിത്സയിലായിരുന്ന മത്സ്യത്തൊഴിലാളി മരിച്ചു. പള്ളം പുല്ലുവിള അർത്തയില് പുരയിടത്തില് പ്രവീസ് (56) ആണ് മരിച്ചത്. മക്കളോടൊപ്പം രണ്ട് നോട്ടിക്കല് മൈല് ദൂരെ ഉള്ക്കടലില് മീൻ പിടിക്കുന്നതിനിടയിലായിരുന്നു സംഭവം.
വലയില് കുടുങ്ങിയ കടല്ച്ചൊറി എടുത്തുമാറ്റുന്നതിനിടയില് കണ്ണില് തെറിക്കുകയായിരുന്നു. അലർജി ബാധിച്ച് കണ്ണില് നീരു വന്നതോടെ പുല്ലുവിള ആശുപത്രിയില് ചികിത്സ തേടി. അസുഖം കൂടിയതോടെ ബന്ധുക്കള് നെയ്യാറ്റിൻകര ജനറല് ആശുപത്രിയിലേക്ക് കൊണ്ടുപോയി. അവിടെനിന്ന് മെഡിക്കല് കോളജ് ആശുപത്രിയിലേക്ക് കൊണ്ടുപോകുമ്പോഴായിരുന്നു മരണം.
കഴിഞ്ഞ മാസം ഉത്തര കന്നഡയിലെ ദേവ്ബാഗിലും കടൽച്ചൊറിയുടെ കുത്തേറ്റ് മത്സ്യത്തൊഴിലാളിക്ക് ജീവൻ നഷ്ടപ്പെട്ടിരുന്നു. ചിലയിനം ജെല്ലിഫിഷുകൾ വിഷം കുത്തിവയ്ക്കുമെന്നും ഇതുമൂലം കുത്തേറ്റ് ഏതാനും മിനിറ്റുകൾക്കുള്ളിൽ ആളുകൾക്കും മൃഗങ്ങൾക്കും പക്ഷാഘാതവും ഹൃദയസ്തംഭനവും മരണവും വരെ അനുഭവപ്പെട്ടേക്കാം എന്നും ആരോഗ്യ വിദഗ്ധരും മുന്നറിയിപ്പ് നൽകിയിട്ടുണ്ട്.
