മുംബൈ: ഒരു കാലത്ത് ബോളിവുഡ് സിനിമാ ലോകം പിടിച്ചു കുലുക്കിയ നടി സ്മൃതി ബിശ്വാസ് അന്തരിച്ചു. 100 വയസായിരുന്നു. വാർദ്ധക്യ സഹജമായ രോഗങ്ങളെ തുടർന്നായിരുന്നു അന്ത്യം. 90കളിൽ ഹിന്ദി, മറാത്തി, ബംഗാളി സിനിമകളിലെ സജീവ സാന്നിധ്യമായിരുന്നു സ്മൃതി ബിശ്വാസ്.
ബാലതാരമായാണ് അഭിനയലോകത്തേക്ക് സ്മൃതി കാലെടുത്തു വച്ചത്. 1960ൽ പുറത്തിറങ്ങിയ ‘മോഡൽ ഗേൾ’ ആയിരുന്നു ആദ്യ ഹിന്ദി ചിത്രം. ഇതിനുമുമ്പ് 1930ൽ പുറത്തിറങ്ങിയ ‘സന്ധ്യ’ എന്ന ബംഗാളി ചിത്രത്തിലും അഭിനയിച്ചു.
ബൽരാജ് സാഹ്നി, ദേവ് ആനന്ദ് തുടങ്ങിയ ഒട്ടനവധി പ്രമുഖർക്കൊപ്പം സ്മൃതി അഭിനയിച്ചിട്ടുണ്ട്. ഹിന്ദി ചിത്രങ്ങളിൽ സജീവമായിരുന്ന സ്മൃതി സംവിധായകനായ എസ്ഡി നരാംഗിനെ വിവാഹം ചെയ്തതോടെ അഭിനയ രംഗത്ത് നിന്ന് പിന്മാറുകയായിരുന്നു. ഭർത്താവിന്റെ മരണ ശേഷമാണ് നാസിക്കിലേക്ക് ഇവർ താമസം മാറിയത്. ഇക്കഴിഞ്ഞ ഫെബ്രുവരി 17-ാം തീയതിയായിരുന്നു രണ്ട് മക്കൾക്കൊപ്പം സ്മൃതി 100-ാം പിറന്നാൾ ആഘോഷിച്ചത്.
