കണ്ണൂർ: കൂടോത്ര വിശ്വാസത്തിൽ രാജ്മോഹൻ ഉണ്ണിത്താനെ പരിഹസിച്ച് മകന്റെ ഫേസ്ബുക്ക് പോസ്റ്റ്. കൂടോത്രത്തിലുള്ള വിശ്വാസം മാനസിക രോഗമാണെന്നും ഇത് ചെയ്യുന്നവരെ തട്ടിപ്പുക്കാർ എന്നല്ലാതെ മറ്റൊന്നും വിളിക്കാൻ കഴിയില്ലെന്നും അമൽ ഉണ്ണിത്താൻ സമൂഹ മാധ്യമത്തിൽ പങ്കുവെച്ച കുറിപ്പിൽ പറഞ്ഞു.
” കൂടോത്രത്തിലും മറ്റ് പിന്തിരിപ്പൻ രീതികളിലും വിശ്വസിക്കുന്ന വ്യക്തികൾ ഇപ്പോഴും ഉണ്ട്. സമൂഹത്തിന്റെ ചിന്താഗതിയെ തടസ്സപ്പെടുത്തുന്ന ചിന്താഗതിയാണിത്. ഇത്തരം വിശ്വാസങ്ങൾ നിലനിൽക്കുന്നത് ആശങ്കാജനകവും നിരാശാജനകവുമാണ്. ഈ വീക്ഷണങ്ങൾ ആരുടേതായാലും, അവ കാലഹരണപ്പെട്ടതും ഒരു സമൂഹമെന്ന നിലയിൽ നമ്മുടെ പുരോഗതിയെ തടസ്സപ്പെടുത്തുന്നതുമാണ്. ഈ സമ്പ്രദായങ്ങളിൽ ഏർപ്പെടുന്ന ആളുകൾ തട്ടിപ്പുക്കാരല്ലാതെ മറ്റൊന്നുമല്ല, സ്വന്തം നേട്ടത്തിനായി അജ്ഞതയെയും ഭയത്തെയും ഇരയാക്കുന്നു. ബ്ലാക്ക് മാജിക് ചെയ്യുന്നുവെന്ന് അവകാശപ്പെടുന്നവരെ എനിക്കെതിരെ പരീക്ഷിക്കാൻ ഞാൻ വെല്ലുവിളിക്കുന്നു!!!! ഞാൻ ഒരു അന്ധവിശ്വാസി അന്ധവിശ്വാസി അല്ലാത്തതിനാൽ അത് തീർച്ചയായും ഏൽക്കില്ല . ഇതരം കാര്യങ്ങൾ അവയിൽ വിശ്വസിക്കുന്നവരെ മാത്രമേ ബാധിക്കുകയുള്ളൂ, കാരണം അവ സ്വന്തം മനസ്സിൽ ഫലങ്ങൾ സൃഷ്ടിക്കുന്നു. അതൊരു മാനസിക രോഗമാണ്”, അമൽ ഫേസ് ബുക്കിൽ പറഞ്ഞു.
തനിക്ക് കൂടോത്രത്തിൽ വിശ്വാസമുണ്ടെന്ന് ചാനൽ പരിപാടിക്കിടെ രാജ്മോഹൻ ഉണ്ണിത്താൻ പറഞ്ഞിരുന്നു. വിശ്വാസമുള്ളവർക്ക് കൂടോത്രം ഫലിക്കുമെന്നും ഉണ്ണിത്താൻ വിശദീകരിച്ചിരുന്നു. കെപിസിസി അധ്യക്ഷൻ കെ സുധാകരന്റെ വീട്ടിൽ നിന്ന് ഉണ്ണിത്താന്റെ സാന്നിധ്യത്തിൽ കൂടോത്രം കണ്ടെടുക്കുന്ന വീഡിയോ ദൃശ്യങ്ങൾ ദിവസങ്ങൾക്ക് മുമ്പ് പുറത്തുവന്നിരുന്നു. ഇതിന് പിന്നാലെയാണ് രാജ്മോഹൻ ഉണ്ണിത്താനെ തളളികൊണ്ടുള്ള മകന്റെ പോസ്റ്റ്.
