കടലും , ആകാശവും പോലെയാണ് മലയാളികൾക്ക് മോഹൻലാൽ . എന്നും ,എപ്പോഴും കണ്ടുകൊണ്ടിരിക്കാൻ ഇഷ്ടമുള്ള മുഖം . ജോജിയായി വന്ന് ചിരിപ്പിച്ച , ജയകൃഷ്ണനായി വന്ന് പ്രണയിപ്പിച്ച , സേതുമാധവനായി വന്ന് വേദനിപ്പിച്ച മലയാളിയുടെ സ്വകാര്യ അഹങ്കാരം . എന്നാൽ ഇപ്പോഴിതാ ലാലേട്ടന് ഇവിടെ മാത്രമല്ല അങ്ങ് പാകിസ്താനിലും ആരാധകരുണ്ടെന്ന് കാണിച്ചു തന്നിരിക്കുകയാണ് സംവിധായകൻ അഖിൽ മാരാർ.
പാകിസ്താൻ പൗരനായ അമീറാണ് കടുത്ത ലാലേട്ടൻ ആരാധകൻ . ദുബായ് എയർപോർട്ടിൽ വച്ചാണ് താൻ അമീറിനെ പരിചയപ്പെട്ടതെന്നും അഖിൽ പറയുന്നു. ‘ ചിലരൊക്കെ വന്ന് എന്റെയൊപ്പം ചിത്രങ്ങളെടുക്കുന്നത് കണ്ടാണ് അമീർ വന്ന് പരിചയപ്പെടുന്നത് . സംസാരിക്കുന്നതിനിടെ സിനിമയെ കുറിച്ചും അൽപ്പം സംസാരിച്ചു. മൊബൈലിൽ മോഹൻലാലിന്റെ ചിത്രം കാണിച്ചു കൊടുത്തപ്പോഴാണ് പറയുന്നത് അമീർ കടുത്ത മോഹൻലാൽ പ്രേമിയാണെന്ന് ‘ എന്നാണ് അഖിൽ മാരാർ പറയുന്നത് .
പാകിസ്താനിൽ പലർക്കും മോഹൻലാലിനെ ഇഷ്ടമാണെന്നും അമീർ പറയുന്നു . ദൃശ്യവും , പുലിമുരുകനുമൊക്കെ അമീർ കണ്ടതായും അഖിൽ മാരാർ പറയുന്നുണ്ട്.
