കൊച്ചി: വിജയ് ബ്രാൻഡിന്റെ പേരുമാറ്റവുമായി ബന്ധപ്പെട്ട് ചില ഓൺലൈൻ മാദ്ധ്യമങ്ങളിലും സോഷ്യൽ മീഡിയകളിലും വന്ന വാർത്തകൾ അടിസ്ഥാന രഹിതമാണെന്ന് മൂലൻസ് ഗ്രൂപ്പ്. ഇത്തരം പരസ്യങ്ങളുടേയും പോസ്റ്ററുകളുടെയും സത്യാവസ്ഥ ബോധ്യപ്പെടുത്താൻ പുറത്തിറക്കിയ വാർത്താകുറിപ്പിലാണ് കമ്പനി ഇക്കാര്യം അറിയിച്ചത്.
ഇന്ത്യൻ ബ്രാൻഡായ വിജയ് ബ്രാൻഡിന്റെ പേരും ലോഗോയും സൗദി അറേബ്യയിൽ SAIP യിൽ ട്രേഡ് മാർക്ക് നിയമമനുസരിച്ചു മൂലൻസ് ഇന്റർനാഷണൽ എക്സിം പ്രൈവറ്റ് ലിമിറ്റഡിന്റെ പേരിൽ രജിസ്റ്റർ ചെയ്തിട്ടുള്ളതാണ്. ചില ഓൺലൈൻ മീഡിയയിലും സോഷ്യൽ മീഡിയയിലും വിജയ് ഇനി മുതൽ മറ്റൊരു പേരായി മാറുന്നു എന്ന രീതിയിൽ ഒരു സിനിമാ താരത്തിന്റെ ഫോട്ടോ വച്ച് പ്രചരിപ്പിക്കുന്ന പരസ്യങ്ങളും പോസ്റ്ററുകളും അടിസ്ഥാനരഹിതമായ കാര്യമാണെന്നു കമ്പനി വ്യക്തമാക്കി.
വിപണിയിൽ വിജയ് ബ്രാൻഡിന്റെ സ്വീകാര്യതയും പ്രശസ്തിയും മുതലെടുക്കാനും ഉപഭോക്താക്കളെ തെറ്റിദ്ധരിപ്പിക്കാനുമായിരുന്നു നീക്കം. ഇതിനെതിരെ നിയമനടപടികൾ സ്വീകരിച്ചുകഴിഞ്ഞു. 40 വർഷമായി സൗദി അറേബ്യയിലെ ഇന്ത്യക്കാരുടെ പ്രത്യേകിച്ച് മലയാളികളുടെ പ്രിയങ്കരമായ വിജയ് ബ്രാൻഡ് യാതൊരു മാറ്റവുമില്ലാതെ തുടർന്നും എല്ലായിടത്തും ലഭ്യമാണെന്ന് കമ്പനി അറിയിച്ചു.
