ന്യൂഡൽഹി: പ്രധാനമന്ത്രി നരേന്ദ്രമോദിയുടെ നേതൃത്വത്തിൽ വികസിത ഭാരതമെന്ന സ്വപ്നം യാഥാർത്ഥ്യമാകുകയാണെന്ന് ബിജെപി ദേശീയ വക്താവ് ആർ കേശവൻ. ഭാരതത്തിന്റെ സംസ്കാരത്തിലധിഷ്ഠിതമായ വികസനപ്രവർത്തനങ്ങൾക്കാണ് പ്രധാനമന്ത്രി ഊന്നൽ നൽകുന്നതെന്നും പാരമ്പര്യവുമായി ജനങ്ങളെ വീണ്ടും ബന്ധിപ്പിക്കുന്നതിന് ഇതിലൂടെ സാധ്യമാകുന്നുവെന്നും കേശവൻ പറഞ്ഞു. വാർത്താ ഏജൻസിയായ എഎൻഐയോടായിരുന്നു അദ്ദേഹത്തിന്റെ പ്രതികരണം.
” ഇന്ന് ഭാരതത്തെ മറ്റ് രാജ്യങ്ങൾ പ്രതീക്ഷയോടെ ഉറ്റുനോക്കുകയാണ്. ഭാരതീയ സംസ്കാരങ്ങൾക്കും പാരമ്പര്യങ്ങൾക്കും ആഗോളതലങ്ങളിൽ നിന്ന് വളരെയധികം ബഹുമാനവും ആദരവുമാണ് ലഭിക്കുന്നത്. ഭാരതത്തിന്റെ പാരമ്പര്യവും സംസ്കാരങ്ങളും ഓർമ്മപ്പെടുത്തുന്ന വികസന പ്രവർത്തനങ്ങളാണ് നടത്തുന്നത്.”- സി ആർ കേശവൻ പറഞ്ഞു.
ഭാരതത്തിന്റെ തനത് സംസ്കാരം ഉയർത്തിപിടിക്കുന്ന വ്യക്തികളിൽ മുൻനിരയിലാണ് പ്രധാനമന്ത്രി. ഇതുകൊണ്ട് തന്നെയാണ് ലോക പൈതൃക സമിതി യോഗത്തിന് ഇന്ത്യ ആദ്യമായി വേദിയാകാൻ പോകുന്നതെന്നും കേശവൻ പറഞ്ഞു. ജൂലൈ 21-ാം തീയതി (ഇന്ന്) മുതൽ 31 വരെ ന്യൂഡൽഹിയിലെ ഭാരത് മണ്ഡപത്തിൽ വച്ചാണ് ലോക പൈതൃക സമിതിയുടെ 46-ാം കോൺവെൻഷൻ നടക്കുന്നത്.
പ്രധാനമന്ത്രി നരേന്ദ്രമോദിയുടെ ദീർഘവീക്ഷണം ഓരോത്തരും ഏറ്റെടുക്കണമെന്ന് അദ്ദേഹം വ്യക്തമാക്കി. . ഇന്ന് ഗുരുപൂർണിമ ദിനമാണ്. അതിനാൽ വേദവ്യാസന്റെ ജന്മദിനത്തെ അനുസ്മരിപ്പിക്കുന്ന ഗുരുപൂർണിമ പ്രധാനമന്ത്രി ഇന്ന് ഉദ്ഘാടനം ചെയ്യുമെന്നും സി ആർ കേശവൻ പറഞ്ഞു.
