കർക്കടകവാവ്; മന്ദിരസമിതി ഗുരുസെന്ററുകളിൽ ബലിതർപ്പണത്തിന് വിപുലമായ സൗകര്യം

നവി മുംബൈ: ശ്രീനാരായണ മന്ദിര സമിതിയുടെ നേതൃത്വത്തിൽ കർക്കടക വാവിനോട് അനുബന്ധിച്ചുള്ള പിതൃബലിതർപ്പണത്തിനായി വിവിധ ഗുരുസെന്ററുകളിലും ഗുരുദേവഗിരിയിലും വിപുലമായ സൗകര്യങ്ങൾ ഏർപ്പെടുത്തി.

നെരൂൾ ഗുരുദേവഗിരിയിൽ

ആഗസ്റ്റ് 3 ന് പുലർച്ചെ 5.30 മുതൽ 12 വരെയാണ് ഗുരുദേവഗിരിയിൽ ബലിതർപ്പണം നടത്തുക. ഗുരുദേവഗിരി മഹാദേവ ക്ഷേത്ര സന്നിധിയിൽ നടക്കുന്ന ബലിതർപ്പണം ഒരു മണിക്കൂർ വീതമുള്ള ബാച്ചുകളായി 12 മണിവരെ തുടരും. 11 ന് പിതൃക്കളുടെ ആത്മശാന്തിക്കായുള്ള തിലസായൂജ്യ ഹോമം നടക്കും. 4 ന് ഞായറാഴ്ചയും അമാവാസി ഉള്ളതിനാൽ അന്നും ബലിയിടാൻ ആഗ്രഹിക്കുന്നവർക്ക് അതിനുള്ള സൗകര്യവും ഗുരുദേവഗിരിയിൽ ഉണ്ടായിരിക്കും.

4 ന് രാവിലെ 7.30 നായിരിക്കും ബലിയിടൽ കർമ്മം നടക്കുക. ദൂരെ നിന്നുള്ളവർക്ക് തലേ ദിവസം ഇവിടെ എത്തി താമസിച്ചു പുലർച്ചെ കുളിച്ചു ബലിയിട്ടു മടങ്ങുന്നതിനുള്ള സൗകര്യവും ഉണ്ടായിരിക്കും. ബലിതർപ്പണത്തിനുശേഷം ലഘു ഭക്ഷണവും ഉണ്ടായിരിക്കും.
രാമായണ മാസാചരണത്തിന്റെ ഭാഗമായി ആരംഭിച്ചിട്ടുള്ള കർക്കടക പൂജ ആഗസ്റ്റ് 16 വരെ തുടരും.

ദിവസവും രാവിലെ ഗണപതി ഹോമം, വിശേഷാൽ അർച്ചന, അഭിഷേകം. തുടർന്ന് രാമായണ പാരായണം. വൈകീട്ട് 7.15 മുതൽ ഭഗവതി സേവ. തുടർന്ന് മഹാപ്രസാദം. ഭക്തർക്ക് അവരവരുടെ നാളുകളിൽ കർക്കടക പൂജ, അന്നദാനം എന്നിവ നടത്തുന്നതിനുള്ള സൗകര്യം ചെയ്തിട്ടുണ്ട്. ആഗസ്റ്റ് 10 ന് വൈകീട്ട് 7.15 മുതൽ സമൂഹ മഹാമൃത്യുഞ്ജയ ഹോമവും ആഗസ്റ്റ് 15 ന് സർവൈശ്വര്യ പൂജയും ഉണ്ടായിരിക്കും. വിവരങ്ങൾക്ക് 7304085880, 9004143880, 9892045445 എന്നീ നമ്പറുകളിൽ ബന്ധപ്പെടാം.

മലാഡ് ഗുരുശാരദാ ക്ഷേത്രത്തിൽ 4 ന്

മലാഡ്: കുരാർ ഗുരു ശാരദാ മഹേശ്വര ക്ഷേത്രാങ്കണത്തിൽ ഈ വർഷത്തെ കർക്കടക വാവുബലി ചടങ്ങുകൾക്ക് വിപുലമായ സൗകര്യങ്ങൾ ഒരുക്കും. ഓഗസ്റ്റ് 4 ന് രാവിലെ 6 മണിക്ക് ബലിതർപ്പണ ചടങ്ങുകൾ ആരംഭിക്കും. ക്ഷേത്രം മേൽശാന്തി നേതൃത്വം നൽകും. ബലിതർപ്പണത്തിന് എത്തുന്ന ഭക്തജനങ്ങൾക്ക് സൗകര്യങ്ങൾ ഒരുക്കുമെന്ന് യൂണിറ്റ് സെക്രട്ടറി വിനേഷ് പി. അറിയിച്ചു. ഫോൺ : 9920437595

മീരാറോഡ് ഗുരുസെന്ററിൽ

മീരാറോഡ്: ശ്രീനാരായണ മന്ദിര സമിതി മീരാറോഡ്, ദഹിസർ, ഭയന്തർ യൂണിറ്റിൽ ആഗസ്റ്റ് 3 ന് ശനിയാഴ്ച രാവിലെ സദാനന്ദൻ ശാന്തി, അമ്പാടി ശാന്തി എന്നിവരുടെ മുഖ്യ കാർമ്മികത്വത്തിൽ രാവിലെ 6 മുതൽ 10 വരെ കർക്കിടകവാവ് ബലിതർപ്പണം, പിതൃനമസ്‌കാരം, തിലഹവനം എന്നിവ ഉണ്ടായിരിക്കുമെന്ന് യൂണിറ്റ് സെക്രട്ടറി സുമിൻ സോമൻ അറിയിച്ചു. ബലിതർപ്പണത്തിനു ശേഷം ലഘു ഭക്ഷണവും ഉണ്ടായിരിക്കും. ഫോൺ: 9892884522 , 9833260420