പുതിയ ഇനം വാമ്പയർ സ്ക്വിഡിനെ തിരിച്ചറിഞ്ഞ് ചൈനയിലെ ഒരുകൂട്ടം ശാസ്ത്രജ്ഞർ. ഈ മത്സ്യം ഏകദേശം 1 അടി (0.3 മീറ്റർ) നീളം വരെ വെയ്ക്കുന്നു. കറുത്ത് തിളങ്ങുന്ന ഭയാനകമായ രൂപമാണ് ഇതിന്. എന്നിരുന്നാലും ആഴക്കടലിലെ മാലിന്യങ്ങളാണ് ഈ വാമ്പയർ സ്ക്വിഡ് ഭക്ഷിക്കുന്നത്.
ചെറിയ അകശേരുക്കളെ മാറ്റിനിർത്തിയാൽ മറ്റൊന്നിനെയും ഇവ ഉപദ്രവിക്കാൻ സാധ്യതയില്ല. സാധാരണയായി മലം, ചത്ത മൃഗങ്ങൾ എന്നിവയാണ് ഇവയുടെ പ്രധാന ഭക്ഷണം. ലോകത്തിന്റെ പല ഭാഗങ്ങളിലും മിതശീതോഷ്ണ, ഉഷ്ണമേഖലാ സമുദ്ര പരിതസ്ഥിതികളിൽ ഇവയെ ഇതിന് മുൻപും കണ്ടെത്തിയിട്ടുണ്ട്.
ചൈനയിലെ ഹൈനാൻ ദ്വീപിന് സമീപമുള്ള ആഴക്കടലിൽ നിന്നാണ് പുതിയ ഇനത്തെ കണ്ടെത്തിയിരിക്കുന്നത്. വാംപൈറോട്യൂത്തിസ് ഇൻഫെർനാലിസ് എന്നും ഇവ അറിയപ്പെടുന്നു. ജർമ്മൻ മറൈൻ ബയോളജിസ്റ്റ് കാൾ ചുൻ നയിച്ച ആഴക്കടൽ പര്യവേഷണത്തിന് ശേഷം 1903-ലാണ് ആദ്യമായി വാമ്പയർ കണവയെ അംഗീകരിച്ചത്. പിന്നീട് ഒരേ ഇനത്തിൽപ്പെട്ട അനവധി കണവകളെ ശാസ്ത്രജ്ഞർ കണ്ടെത്തി. വാംപൈറോട്യൂത്തിസ് കുടുംബത്തിൽ മുമ്പ് അറിയപ്പെടാത്ത ഒരു സെഫലോപോഡിൽ പെട്ടതാണ് ചൈനയിൽ നിന്ന് കണ്ടെത്തിയ പുതിയ ഇനം.
