ആലപ്പുഴ: ബാങ്ക് ഓഫ് ഇന്ത്യയുടെ സ്റ്റാഫ് യൂണിയൻ സംസ്ഥാന സമ്മേളനത്തിൽ പാകിസ്താൻ മുൻ പ്രസിഡന്റ് പർവേസ് മുഷറഫിന് അനുസ്മരണം. ജൂലൈ 27ന് (നാളെ) ആലപ്പുഴയിൽ വച്ച് നടക്കാനിരിക്കുന്ന സംസ്ഥാന സമ്മേളന പരിപാടിയിലാണ് പാകിസ്താൻ മുൻ പ്രസി‍ഡന്റിന് ആദരമർപ്പിക്കുക. സംസ്ഥാന സമ്മേളന പ്രവർത്തന രേഖയിലാണ് ഇതുസംബന്ധിച്ച പരാമർശമുള്ളത്.
കാർഗിൽ വിജയ ദിവസത്തോടനുബന്ധിച്ച് രാജ്യത്ത് അനുസ്മരണ പരിപാടികൾ നടക്കുന്നതിനിടെയാണ് യൂണിയന്റെ ഇന്ത്യാവിരുദ്ധ നിലപാടെന്നത് ശ്രദ്ധേയമാണ്. പാക് പട്ടാള മേധാവിയും പ്രസിഡന്റുമായിരുന്ന പര്‍വേസ് മുഷറഫിന്റെ നിർദേശപ്രകാരം നുഴഞ്ഞുകയറ്റക്കാർ കശ്മീരിലെത്തുകയും അവരെ ഇന്ത്യൻ സൈന്യം തുരത്തുകയും ചെയ്തതിന്റെ 25-ാം വാർഷിക സമയത്തുതന്നെ പർവേസ് മുഷ്റഫിന് അനുസ്മരണം ഒരുക്കുന്ന സ്റ്റാഫ് യൂണിയന്റെ നീക്കത്തിനെതിരെ പ്രതിഷേധം ഉയരുകയാണ്.
ആലപ്പുഴയിലെ പോളി ജോർജ് നഗറിലാണ് നാളെ സമ്മേളനം നടക്കുന്നത്. യൂണിയന്റെ 23-ാമത് സംസ്ഥാന സമ്മേളനമാണിത്. കെ.സി വേണുഗോപാൽ എംപിയാണ് സമ്മേളനം ഉദ്ഘാടനം ചെയ്യുന്നത്. നിരവധി പ്രമുഖരെ സമ്മേളനത്തിൽ ആദരിക്കുകയും അനുസ്മരിക്കുകയും ചെയ്യുന്നതിനൊപ്പമാണ് പാക് മുൻ പ്രസിഡന്റിനേയും ഉൾപ്പെടുത്തിയിരിക്കുന്നത്. അന്തരിച്ച പിന്നണി ഗായിക വാണി ജയറാം, ടെലിവിഷൻ താരം സുബി സുരേഷ്, നടൻ ഇന്നസെന്റ് എന്നിവരുടെ പേരിനൊപ്പം പാക് മുൻ പ്രസിഡന്റ് പർവേസ് മുഷറഫിനെയും ഉൾപ്പെടുത്തുകയായിരുന്നു.
