വയനാട്ടിലെ ദുരിതബാധിതരുടെ പുനരധിവാസത്തിന് കേരളം ഒറ്റക്കെട്ടായി നിൽക്കണമെന്ന് മഞ്ജു വാര്യർ. ഉരുൾപൊട്ടൽ വിതച്ച ദുരിതത്തെ മലയാളികളുടെ ഒന്നടങ്കം വേദനയായിട്ടാണ് കാണുന്നത്. സ്വന്തം വീട്ടിൽ സംഭവിച്ച വേദനയോടെയാണ് ഓരോ വാർത്തയും കേൾക്കുന്നത്. വയനാടിനെ പുനർനിർമ്മിക്കാനും ദുരിതബാധിതരുടെ ഒപ്പം ഒന്നും നോക്കാതെ നിൽക്കുകയാണ് വേണ്ടത്. ജാതിയും മതവും രാഷ്‌ട്രീയവും നോക്കാതെ ഒറ്റക്കെട്ടായി നിൽക്കണം.
ഒറ്റക്കെട്ടായി നിന്ന് ദുരിതത്തെ അതിജീവിച്ച ശീലമാണ് മലയാളികൾക്കുള്ളത്. മഹാപ്രളയത്തെ പോലും എല്ലാവരെയും ചേർത്ത് പിടിച്ചാണ് നമ്മൾ അതിജീവിച്ചത്. മറ്റുള്ളവരുടെ വേദന സ്വന്തം വേദനയായി കണ്ടുകൊണ്ട് പ്രതിസന്ധികളിൽ ഒറ്റക്കെട്ടായി നിന്നാണ് മലയാളികളുടെ ശീലം. അതുകൊണ്ട് വയനാടിന്റെ കാര്യത്തിലും പ്രിയ സഹോദരങ്ങൾക്കൊപ്പം ഒറ്റക്കെട്ടായി നിലകൊള്ളണമെന്നും മഞ്ജു വാര്യർ പറഞ്ഞു.
വയനാടിന്റെ കണ്ണീരൊപ്പാൻ മുഖ്യമന്ത്രിയുടെ ദുരിതാശ്വാസ നിധിയിലേക്ക് മഞ്ജു വാര്യർ 5 ലക്ഷം രൂപ നൽകിയിരുന്നു. നടിയുടെ നേതൃത്വത്തിലുള്ള മഞ്ജു വാര്യർ ഫൗണ്ടേഷനാണ് ദുരിതാശ്വാസ നിധിയിലേക്ക് പണം കൈമാറിയത്.
