വയനാട്: ഉരുൾപൊട്ടലിൽ മുണ്ടക്കൈ ഗ്രാമം നാമാവശേഷമായതിനെ തുടർന്ന് ശ്രീകൃഷ്ണ ജയന്തി ശോഭായാത്രകൾ ഒഴിവാക്കിയതായി ബാലഗോകുലം. വയനാട് ജില്ലയിൽ ഇത്തവണ നടക്കേണ്ട ശ്രീകൃഷ്ണ ജയന്തി ശോഭായാത്രകളാണ് ഒഴിവാക്കിയത്.
ശ്രീകൃഷ്ണ ജയന്തി ദിവസമായ ഓഗസ്റ്റ് 26ന് കുട്ടികളും കുടുംബാംഗങ്ങളും ഒരുമിച്ചുള്ള പ്രാർത്ഥന സഭകൾ സംഘടിപ്പിക്കും. സംസ്ഥാനത്താകെ ആർഭാടങ്ങൾ ഒഴിവാക്കി ഭക്തിസാന്ദ്രമായിട്ടായിരിക്കും ശോഭായാത്ര. പരിസ്ഥിതിയേയും ദേശീയതയേയും ഒരുപോലെ പ്രകാശിപ്പിക്കുന്ന ‘പുണ്യമീ മണ്ണ്; പവിത്രമീ ജന്മം’ എന്നതായിരിക്കും ഇത്തവണത്തെ ശ്രീകൃഷ്ണ ജയന്തി സന്ദേശം.
എല്ലാ സ്ഥലങ്ങളിലും ശോഭായാത്ര ആരംഭിക്കുമ്പോൾ ദുരന്തത്തിൽ ജീവൻ നഷ്ടപ്പെട്ട സഹോദരങ്ങൾക്ക് ശ്രദ്ധാഞ്ജലി അർപ്പിച്ചുകൊണ്ട് അനുശോചനസന്ദേശം വായിക്കും. ശോഭായാത്രയിൽ പങ്കെടുക്കുന്നവരെല്ലാം വയനാട് സ്നേഹനിധി സമർപ്പണം ചെയ്യുമെന്നും സംസ്ഥാന അധ്യക്ഷൻ ആർ. പ്രസന്നകുമാർ , പൊതുകാര്യദർശി കെ.എൻ.സജികുമാർ എന്നിവർ അറിയിച്ചു.
